1 Relles 2 - Biblia ande chib Romani

E alava kai mukla o David

¹ Ta avile e llivesa kana o David saia po meripe, ta mukla gala alava pe chaurreke e Salomonoke:

² Me llautar po drom kai sa llan pe gaia phuv. De tut zor ta lla sargo murus tromano.

³ Cher e volia e Devleki, lla pe leke droma ta guruv leke alava sar si pisime ando zakono e Moiseseko, te sai llal chuke sukar pe sa so ka chere,

⁴ te sai cherel o Del so phenda mange, kai te avena me chave orta angla le ta te avela lengo lio chacho, suako drom ka avel iek murus te besel po trono e Israeleko.

⁵ Tu llane so cherda mange o Joab chavo katar o Sarvia ta so cherda e duie gazdenge katar e boñikura katar o Israel, so cherda e Abnereke chavo katar o Ner, ta e Amasaeke chavo katar o Jeter kai mundarda len ta chordilo o rat kana ni saia ni iek maripe, ta makhilo ando rat o kavisi kai saia pe leke dume ta i leke minie.

⁶ Tu cher e ezgode bizaimaia. Na muk te merel phuro ande pas.

⁷ A tu ka ave lacho e chavenchar katar o Barzilai katar e vicha e Galaadeki, te aven pe chi sinia, soke von pomozisarde man kana me naslem katar cho phlal o Absalon.

⁸ Ta i si tuia o Simei chavo katar o Gera katar e vicha e Benjamineki katar o foro o Bajurim. Vou dia man bare armaia kana me llava karing o Majanaim. A isto vou avilo te lel man karing o Jordan, ta me jalem leke sovel ando anav e Devleko kai ni ka mundarav le e jarniea.

⁹ Tu ni ka prosti le, tu san bizai ta llane so si te chere lea. Cher te avel leko meripe sa ando rat.

O meripe e Davideko

¹⁰ O David mulo ta prajosarde le pasa leke dada ando limori katar leko foro.

¹¹ O David charoisarda ando Israel saranda burs. Efta burs charoisarda ando Jebron, ta tranda ta trin burs charoisarda ando Jerusalem.

¹² Ta o Salomon beslo pe Davideko trono, ta leki charoina cherdili zurali.

O meripe katar o Adonias ta leke sluge

¹³ Ondaka o Adonias chavo katar o Jagit avilo kai e Betsabe e dei e Salomonoki, ta voi phenda leke: ¿Ave ande pas? Ta o Adonias phenda lake: Ea, avav ande pas.

¹⁴ Mapalal phenda lake: Si man te phenav chuke iek ezgoda. Ta voi phenda leke: Phen.

¹⁵ Ta o Adonias phenda: Tu llane kai e charoina saia murni, ta sa o Israel mangela te avav me o charo. A chinade me phlale o Salomon te charoil, soke gua saia e Devletar te avel vou o charo.

¹⁶ Akana mangav tutar iek sebapi, na phen mange kai iok. Ta e Betsabe phenda leke: ¿So mange?

¹⁷ Me moliv man chuke te mange katar o charo o Salomon te del man e Abisage e sunamita, te avel mi rromi. Vou ni ka phenel chuke kai iok.

¹⁸ Ta e Betsabe phenda leke: Ako, me ka dav orba cheres tu e Salomonoke.

¹⁹ Ondaka e Betsabe avili kai o Salomon te del e orba pala o Adonias. O charo ustilo soke avili leki dei, ta bangilo llik kai e phuv angla la. Mapalal pale beslo po trono ta phenda te anen iek estolicha te sai besel leki dei, ta voi besli pe leki rig e chachi.

²⁰ Ondaka e Betsabe phenda leke: Cher mange iek sebapi. Na phen mange iok. Ta o charo phenda lake: Mang sogo kamea, soke ni ka phenav chuke kai iok.

²¹ Ta voi phenda: De e Abisage e sunamita pala o Adonias.

²² Ta o charo o Salomon phenda pe dake: ¿Soke mange e Abisage pala o Adonias? ¡Te si gia mang mandar te dav le e charoina samo soke vou si mo phlal o mai purano, ta soke o popo o Abiatar ta o Joab chavo katar o Sarvia pomozin le!

²³ Ondaka o charo o Salomon jala sovel ando anav e Devleko, ta phenda: ¡Te dukhavel man o Del te na pochinda o Adonias pe zivotoia pala so phenda!

²⁴ ¡Jav sovel angla o Del, kai thoda man po trono e Davideko mo dad, ta kai cherda te avav charo, ta ka cherel i me porodo, kai o Adonias ka merel isto allive!

²⁵ Ondaka o charo o Salomon bichalda e Benaiase chavo katar o Joiada te mundarel e Adoniase. Ta o Benaias llelo ta mundarda le.

²⁶ Mapalal o Salomon tradia e popo e Abiatare, ta phenda leke: ¡Llatar ando Anatot, kai chi phuv! Tu morabi te mere, a ni ka mundarav tut soke inllardan e arka katar o Del o Gazda, ta soke nakhlan isto gala brige kai nakhla mo dad.

²⁷ Gia o Salomon tradia e Abiatare katar o rado e poponengo, ta gia cherdilo so phendaia o Del ando Silo katar e familia katar o Eli.

²⁸ Ta gaia viasta avili kai o Joab, kai pomozila e Adoniase, a ni lleloia e Absalonea. Ta kana o Joab asunda e viasta, naslo kai e chara e Devleki, ta istardilo pe singa katar o altar.

²⁹ Ta phende e Salomonoke kai o Joab nasloa ta kai gurudilo ande chara e Devleki pasa o altar. Ondaka o Salomon bichalda e Benaiase chavo katar o Joiada te mundarel le.

³⁰ Ta o Benaias dia andre ande chara e Devleki ta phenda e Joabeke: O charo phenel te like. A o Joab phenda: ¡Iok! ¡Kate ka merav! Ta o Benaias llelo kai o charo te phenel leke so phendaia o Joab.

³¹ Ta o charo phenda: Cher so phenda vou. Mundar le ta prajosar le, ta duriar katar me dadeko cher ta i mandar e dos katar e llene lache kai vou mundarda

³² O Del ka cherel te perel pe lete sa e dos, goleke o Joab ka merel soke mundarda e jarniea duie llenen orta, e Abnere chavo katar o Ner gazda katar e boñikura katar o Israel, ta e Amase chavo katar o Jeter, gazda katar e boñikura e Judaeke.

³³ Lengo rat ka perel po soro e Joabeko, ta ostade pe leki familia. A e pas e Devleki ka avel ostade po David ta pe leko porodo, pe leki charoina ta pe leko trono.

³⁴ Ondaka o Benaias llelo ta mundarda e Joabe. Ta prajosarde le po pusto ande leko cher.

³⁵ Ta o charo thoda e Benaiase chavo katar o Joiada gazda e boñikonengo, ta e Sadoke thoda le po rado e poponengo, po than katar o Abiatar.

³⁶ Mapalal o charo ikharda e Simeie, ta phenda leke: Vazde chuke iek cher ando Jerusalem te sai zivi kote. Na like kotar ta na lla ninde,

³⁷ soke te likistan ta te nakhlan o pai katar o Sedron, chachimaia ka mere ta ka avel chiri dos.

³⁸ Ta o Simei phenda e charoke: Ako. Me ka cherav gia sar phendan le, mo glamno charo. Ta o Simei zivisarda ando Jerusalem but vreme.

³⁹ Kana nakhle trin burs, dui sluge katar o Simei nasle kai o Akis chavo katar o Maaka, o charo katar o foro Gat. Ta phende e Simeieke kai dui katar leke sluge sea ando foro o Gat.

⁴⁰ Ondaka o Simei llelo po magarcho kai o Akis ando foro Gat te anel leke slugen. Ta kana o Simei irilape pe slugenchar,

⁴¹ o Salomon llangla kai o Simei likistoia katar o Jerusalem karing o foro o Gat, ta kai irisailo.

⁴² Ta ikharda e Simeie, ta phenda leke: ¿Ni jalan sovel kai ni ka like katar o foro, soke te likistana chachimaia ka mere? ¿Ni phendam mange kai gia ka chere?

⁴³ ¿Soke phaglan o alav kai dian e Devle, ta ni cherdan so me phendem chuke?

⁴⁴ Tu llane sa o bilachipe kai cherdan me dadeke e Davideke, goleke o Del cherda te perel pe cho soro sa o bilachipe kai cherdan.

⁴⁵ A o charo o Salomon ka avel blagosime, ta o trono e Davideko ni ka murilpe nikada soke si ostade angla o Del.

⁴⁶ Ondaka o charo phenda e Benaiaseke chavo katar o Joiada te mundarel e Simeie, ta o Benaias mundarda le. Gia e charoina cherdili zurali ande va e Salomonoke.