1 Relles 19 - Biblia ande chib Romani

O Elias nasel ando Joreb

¹ O Ajab phenda e Jezabeleke sa so cherdaia o Elias, ta sar e jarnienchar mundarda e profetanen katar o Baal.

² Ondaka e Jezabel bichalda llenen te phenen e Eliaseke: ¡Te dukhaven man murne dela te na cherava tuia thiara so cherdan tu e profetonenge!

³ Kana o Elias dikhla kai saia ande bari nuzda llelotar ando Berseba kai si ando Juda te na mundaren le, ta mukla kote pe sluga.

⁴ Ta llelotar po pusto ta phirda sorro llive. Ta beslo telal katar iek enebro ta mangela te merel ta phenda: ¡Dosta, mundar man Devla! Me ni sem mai lacho neko me dada.

⁵ Ta thodape te sovel telal katar o enebro. Ondaka iek suecho e Devleko dodisarda le, ta phenda leke: Uste ta ja.

⁶ Ta o Elias dikhla pasa po seran iek marrno chirado pe angara ta iek taso pai. Jala, pila ta thodape te sovel pale.

⁷ Pale o duito drom avilo o suecho e Devleko ta dodisarda le, ta phenda leke: Uste ta ja, soke baro drom si te phire.

⁸ Ustilo, jala ta pila. Ta o jape dia le zor te phirel saranda llive ta saranda racha llik kai o Joreb, o burdo e Devleko.

⁹ Kana avilo, dia andre maskar iek pechina. Ta o Del dia lea orba, ta phenda leke: ¿So chere kate, Elias?

¹⁰ Ta vou phenda: Me sem but joliariko pala tu Devla kai si tut sa e zor soke e chave e Israeleke mukle tut, perade che altarura ta mundarde che profetanen. Samo me achilen ta roden man te mundaren man.

¹¹ Ta o Del phenda leke: Like avri ta achi pe porrne angla ma, po burdo. Ta o Del nakhla kotar, ta iek bari balav phurdela gia zurale kai phagela e burdura ta phagela e barra, a o Del ni saia ande balav. Mapalal dermosaili e phuv, a o Del ni saia ando dermope.

¹² Mapalal katar o dermope avili iag, a o Del ni saia ande iag. Mapalal katar e iag, asundilo iek sol poloke.

¹³ Ta kana asunda le o Elias, ucharda po mui e gertachea ta likisto avri katar e pechina. Ta iek avazi phenda leke: ¿So chere kate Elias?

¹⁴ Ta vou phenda: Me sem but joliariko pala tute Devla kai si tut sa e zor, soke e chave e Israeleke mukle tut, perade che altarura, ta mundarde che profetanen. Samo me achilem ta roden man te mundaren man.

¹⁵ Ta o Del phenda leke: Irisao po drom katar avilan po pusto, ta lla ando Damasko. Kana ka ave thov zeitino po Jazael te avel o charo katar e Siria.

¹⁶ E Jeue chavo katar o Nimsi, ka thove le te charoil ando Israel. Ta e Eliseo chavo katar o Safat, katar o foro Abel Mejola, ka thove le te avel profeta pe cho than.

¹⁷ Ta o lleno kai ka nasel katar o jarni e Jazaeleko, o Jeu ka mundarel le. Ta o lleno kai ka nasel katar o jarni e Jeueko, o Eliseo ka mundarel le.

¹⁸ A me ka cherav te achen ando Israel efta milie llene kai ni die changenchar angla o Baal ta ni chumidie le.

O Del ikharel e Eliseo

¹⁹ O Elias llelotar kotar ta malada e Eliseo chavo katar o Safat, kai radila e phuv bistastare guruvenchar phangle po dui, ta vou inllarela e dui mai palune. Ta kana nakhlo o Elias, thoda po gertachi po Eliseo.

²⁰ Ondaka o Eliseo mukla e guruven ta prastindo avilo kai o Elias, ta phenda leke: Muk man te chumidav me dade ta me da, ta ka llav pala tu. Ta o Elias phenda leke: Lla ta irisao, ¿so cherdem chuke me?

²¹ O Eliseo llelo ta lia duie guruven, mundarda len, chinda len pe kotora, ta e kastea kai o putaren e phuv cherda iag, chirada o mas, ta dia le e foroke te jan. Mapalal llelotar pala o Elias.