1 Relles 18 - Biblia ande chib Romani

O Elias pale avel angla o Ajab

¹ Nakhle trin burs, ta o Del dia orba e Eliasea, ta phenda leke gia: Lla kai o Ajab, ta me ka cherav te delpeke pe phuv.

² O Elias llelo kai o Ajab. Ta e bok ande Samaria saia but bari.

³ O Ajab ikharda e Abdiase, leko sluga. Ta o Abdias saia iek lleno kai dela but liubao e Devle.

⁴ Soke kana e Jezabel mundarela e Devleke profetanen, o Abdias guruda stotine porauken. Fulada len po pinda ta guruda len maskar e pechine, ta pravarda len marrnea ta piea.

⁵ Ondaka o Ajab phenda e Abdiaseke: Aide phira e phuv te dikha sa e bunaria ta sa e paia dal si char te da te jan e gra ta e magarchura te na meren.

⁶ Ta fulade e phuv te phiren la. O Ajab llelo korkorre pe iek drom ta o Abdias llelo korkorre pe aver drom.

⁷ Ta kana llala o Abdias po drom malada e Eliase. Ta kana llangla kai saia vou, dia changenchar angla le ta phenda leke: ¿Ni san tu mo gazda o Elias?

⁸ Ta o Elias phenda leke: Ea, me sem. Lla kai cho gazda ta phen leke kai sem kate.

⁹ A vou phenda leke: ¿So cherdem me te de man kai o Ajab te mundarel man?

¹⁰ Ando anav e Devleko phenav chuke kai inai ni iek phuv kai mo gazda ni rodia tut. Ta kana phenena leke kai tu ni sana kote, mo gazda cherela len te jan sovel te sai llanel dal si istina kai ni dikhlea tut.

¹¹ ¿Ta akana phene mange te llav lete te phenav leke kai san kate?

¹² Kana me ka llautar, o duo e Devleko ka inllarel tut pe aver rig kai me ni ka llanav, ta kana ka avav e Ajabeke te dav le e viasta tutar vou ka avel, ta te na malavela tut, ka mundarel man. A me blagosiv e Devle sar kana sema terno.

¹³ ¿Ni phende chuke so cherdem kana e Jezabel mundarela e Devleke profetanen, ta sar gurudem stotine profetanen ta sar fuladem len po pinda ande pechine, ta pravardem len e marrnea ta e paiea?

¹⁴ ¿Ta akana tu phene mange te llav kai cho gazda ta te phenav leke kai san kate? ¡Vou ka mundarel man!

¹⁵ Ta o Elias phenda leke: Jav chuke sovel angla o Del kai si le sa e zor kai isto allive ka llav kai o Ajab.

¹⁶ Ondaka o Abdias llelo kai o Ajab, ta dia le e viasta katar o Elias. Ta o Ajab avilo te dikhel e Eliase.

¹⁷ Kana o Ajab dikhla e Eliase, phenda leke: ¿Tu san gua kai diliarel e Israele?

¹⁸ Ondaka o Elias phenda leke: Me ni diliarav nika. Tu ta chi familia cheren le, soke muken o zakono e Devleko ta blagosin e delen baal.

¹⁹ Phen akana, te chidiniaol sa o foro katar o Israel po burdo o Karmelo, ta i te chidiniaon e star stotine ta pinda poraukura katar o Baal, ta e star stotine poraukura katar e Asera, kai jan pe sinia e Jezabeleki.

O Elias ta e poraukura katar o Baal

²⁰ Ondaka o Ajab ikharda e israelen, ta chidia e profetanen po burdo o Karmelo.

²¹ Ta o Elias avilo, ta phenda e foroke: ¿Gachin ios ka llan pe dui droma? Te si kai o Gazda si o chachuno Del, llan pala le, a te si o Baal, tumen morabi te llan pala o Baal. Ta o foro ni phenela niso.

²² Ta i phenda o Elias e foroke: Me sem o edino profeta e Devleko kai achilo, a e poraukura katar o Baal si star stotine ta pinda.

²³ Den amen dui guruva ta esvirin iek lendar, chinen le pe kotora ta thoven le pe kasta, ta na phabaren iag telal. Me ka cherav aver guruv ta ka thovav le pe kasta ta ni ka phabarav iag telal.

²⁴ Ikharen tumen tumare delen, a me ka ikharav e Devle. ¡O del kai ka bichalel iag, vou si o Del chachuno! Ta sa o foro phenda: ¡Sukar so phendan!

²⁵ Ondaka o Elias phenda e profetonenge katar o Baal: Esvirin tumen iek guruv ta cheren mai anglal soke tumen sen mai but. Ikharen tumare delen ta na thoven iag telal.

²⁶ Ta von lie o guruv kai die lende ta cherde le, ta ikharde e Baale katar e thiarin llik kai e dusudui e lliveseke, ta phenena: ¡Asun Baal, de orba amenge! Ta jutena truial katar o altar kai cherdea, ta ni asundilo ni iek avazi te del len anglal.

²⁷ Kana saia ande desudui e lliveseke, o Elias marela lendar espurnia, ta phenela lenge: Urkin mai zurale soke vou si iek del. Sai avel kai mislilpe, o radil, o llal finde, sai avel kai llelo ande umal, o llelotar, o sai avel kai akana vou sovel ta morabi te llungaven le.

²⁸ A von bare avazea urkina ta raninape e churienchar sar cherena le suako drom lligo ni chordola lengo rat pe lende.

²⁹ Nakhlo o dopas katar o llive ta von urkina sargo dile lligo ni avilo o saiato kai delpe o kurbano, ta ni asundilo ni iek avazi, ta ni phendilo ni iek alav ni ko te asunel.

³⁰ Ondaka o Elias phenda e foroke: Aven karinga. Ta sa o foro avilo pasa o Elias, ta vou lacharda o altar e Devleko kai saia peradino.

³¹ Ta o Elias lia desudui barra, gia sar si desudui viche katar e chave e Jakobeke kai o Del ikharda le Israel,

³² ta e barrenchar vazdia iek altar ando anav e Devleko. Mapalal cherda iek o ooi truial te resen desudui litrura pai,

³³ lacharda e kasta, chinda e guruve pe kotora, ta thoda le upral pe kasta.

³⁴ Ta phenda: Peren star piria pai ta chuden len pe kasta ta po kurbano kai phabardol. Ta phenda te cheren le dui droma. Ta i phenda te cheren le iek drom ios, ta gia cherde le von.

³⁵ Ta o pai perela truial katar o altar, ta pherdilo pai o ooi.

³⁶ Kana avilo o saiato te den o kurbano kai phabardol, o Elias phenda: ¡Devla, Del e Abraameko, e Isaakeko, ta e Israeleko, cher te dikhol allive kai tu san o Del ando Israel, kai me sem cho sluga ta kai tu bichaldan man te cherav sa gala ezgode!

³⁷ Asun man Devla de man anglal, te sai pinllarel gava foro kai tu san o Del, ta kai tu chere te irinpe tute lenge lie.

³⁸ Ondaka peli iag e Devletar ta phabarda o kurbano, e kasta, e barra ta o prajo, ta i sukarda o pai kai saia ando o ooi.

³⁹ Ta kana o foro dikhla gaia bari ezgoda, die changenchar ta phende: ¡O Gazda si o Del, o Gazda si o Del!

⁴⁰ Ondaka o Elias phenda lenge: ¡Phanden e profetanen katar o Baal! ¡Te na nasel ni iek lendar! Ta o foro phangla len, ta o Elias inllarda len kai paiorro katar o Kison, ta kote chinda lengi korr.

O Elias molilpe te sai delpeke

⁴¹ Ondaka o Elias phenda e Ajabeke: Lla, ja ta pi, soke baro bursin avel.

⁴² O Ajab llelo te jal ta te piel. Ta o Elias likisto po burdo o Karmelo, ta dia changenchar lligo ni thoda po mui maskar pe changa,

⁴³ ta phenda pe slugake: Lla ta dik pe mora. O sluga llelo, ta phenda: Inai niso. A o Elias phenda leke: Lla efta droma.

⁴⁴ O eftato drom o sluga phenda e Eliaseke: ¡Incha, likel katar e mora iek oblako sargo iek va! Ta o Elias phenda leke: Lla kai o Ajab ta phen leke te lacharel po bordon te sai llaltar oma, te na achavel le o bursin.

⁴⁵ O Ajab likisto ando bordon ta llelotar ando Jezreel. Isto kote thoda te delpeke zurale, ta thoda te phurdel iek bari balav.

⁴⁶ Ta o va e Devleko saia po Elias, ta o Elias phangla zurale pe patave, ta prastindo avilo ando Jezreel mai oma neko o Ajab.