1 Relles 17 - Biblia ande chib Romani

O Elias phenel kai ni ka delpeke

¹ Ondaka o Elias tisbita, kai zivila ando Galaad, phenda e Ajabeke: ¡Ando anav katar o Del e Israeleko, me kai sem leko sluga, phenav chuke kai ni ka pechalpeke ta ni ka delpeke ande sa gala bursa lligo ni ka phenav le me!

² Ta o Del phenda e Eliaseke gia:

³ Llatar chuke katar, lla karing likel o kham ta achi pe iek than gurudino pasa o paiorro katar o Kerit kai si angla o Jordan.

⁴ Ka pie pai katar o paiorro, ta me bichaldem e kuervura te den tut te ja kote.

⁵ Ta o Elias cherda so phenda leke o Del, ta llelotar te zivil pasa o paiorro katar o Kerit kai si angla o Jordan.

⁶ Ta e kuervura thiarinako ta pasa racha anena leke marrno ta mas, ta piela pai katar o paiorro.

⁷ Kana nakhle nesave llivesa o paiorro sukilo soke ni delapeke pe phuv.

O Elias ta e phivli katar o foro o Sarepta

⁸ Ondaka o Del phenda e Eliaseke:

⁹ Uste ta lla ando Sarepta kai si ando Sidon, ta achi kote, soke me phendem iekhe phivliake kotar te pravarel tut.

¹⁰ Ondaka o Elias ustilo ta llelotar ando Sarepta. Ta kana avilo kai o udar e foroko, iek diskinia chidela kastorra. Ta o Elias ikharda la, ta phenda lake: Me moliv man chuke, an mange cherricha pai te piav.

¹¹ Ta kana voi llala te anel leke pai, o Elias pale ikharda la, ta phenda lake: Ta i an mange kotor marrno.

¹² Ta voi phenda leke: Angla o Del phenav le chuke, kai inai man marrno chirado. Samo iek umpa arina ande piri, ta cherricha zeitino ando taso. Ta akana chidav kasta te pekav le te ja me ta mo chaurro, ta mapalal te mera bokhatar.

¹³ Ta o Elias phenda lake: Na dara. Lla ta cher so phendan. A mai anglal cher mange iek marrno minono ta an le mange. Mapalal cher aver chuke ta che chaurreke.

¹⁴ Soke o Del e Israeleko phenda kai ni ka getolpe e arina ande piri ni o zeitino ando taso lligo ni ka cherel o Del te delpeke pe phuv.

¹⁵ Ondaka voi cherda sar phenda lake o Elias. Ta jala vou, voi, ta o minono but llivesa.

¹⁶ Ta e arina ni getosaili ande piri ni o zeitino ando taso, gia sar phendaia le o Del e Eliaseke.

¹⁷ Nakhla nesavo vreme ta o minono e phivliako nasualio, ta leko nasualipe saia but baro, gachin kai nasti lela peke duo.

¹⁸ Ta voi phenda e Eliaseke: ¿So si man tuia, lleno e Devleko? ¿Avilam te chere te dav man golli katar me bilache ezgode ta te merel mo minono?

¹⁹ Vou phenda lake: An mande e minone. Ta o Elias lia e minone katar laki angali ta inllarda le kai pi soba, ta inzarda le pe pi postelia.

²⁰ Ta bare avazea ikharda e Devle, ta phenda: ¿Soke dukhadan i e phivlia kai ziviv ande lako cher ta cherdan te merel lako minono?

²¹ Ta inzilo upral po minono trin droma, ta bare avazea ikharda e Devle, ta phenda: Gazda ta Del murno, moliv man chuke: ¡Cher ta llungadol gava minono!

²² Ta o Del asunda o avazi e Eliaseko, ta cherda te llungadol o minono.

²³ Ondaka o Elias lia e minone, likisto katar pi soba ta inllarda le kai leki dei, ta o Elias phenda lake: ¡Dik, cho chaurro zivil!

²⁴ Ta e diskinia phenda leke: Akana llanav kai istina san iek lleno e Devleko, ta kai o alav e Devleko kai phene si o chachipe.