1 Relles 16 - Biblia ande chib Romani

¹ Ta o Del phenda e Jeueke chavo katar o Janani cheres o bilachipe e Baaseko, ta phenda:

² Me ikandem tut katar o prajo ta thodem tut gazda pe mo foro o Israel, a tu llelan po drom e Jeroboameko, ta cherdan me foro e Israele te cherel o bilachipe, ta pala o bilachipe kai cherdan joliardan man.

³ Goleke me ka zatriv sa che familia, ta ka cherav lake isto gia sar cherdem e familiake katar o Jeroboam, chavo katar o Nabat.

⁴ Suako lleno katar e familia e Baasaeki kai ka merel ando foro, ka jan le e llukela. A te merela ando vos, ka jan le e chiriklia.

⁵ Sa e ezgode kai cherda o Baasa ta katar leko gazdaripe si pisime ando lil katar e charura e Israeleke.

⁶ Kana mulo o Baasa, prajosarde le leke puranenchar ando Tirsa, ta pe leko than charoisarda o Ela, leko chavo.

⁷ Katar o profeta o Jeu, chavo e Jananieko, o Del phenda kai ka zatril e Baase ta leke familia, soke cherde o bilachipe angla o Del. O Baasa joliarda e Devle soke cherde isto gola ezgode bilache kai cherdaia o Jeroboam ta leki familia, goleke zatrisarda len.

O Ela ta o Zimri charoin ando Israel

⁸ Kana nakhle bis ta sov burs sar kana thoda o Asa te charoil ando Juda, o Ela chavo e Baaseko, thoda te charoil po Israel ando Tirsa, ta charoisarda dui burs.

⁹ A o Zimri, o gazda katar e bordona marimake, mislisailo te peravel le. Iek llive kana o Ela saia mato ando cher katar o Arsa leko sluga, ande Tirsa,

¹⁰ avilo o Zimri ta mundarda le, ta charoisarda pe leko than. Gua saia ando bis ta eftato burs katar e charoina e Asaeki ando Juda.

¹¹ Samo thoda te charoil o Zimri, mundarda sa e familia katar o Baasa. Ni mukla llundo ni iekhe muruse, ni pharnave, ni nika katar leki familia.

¹² Gia o Zimri zatrisarda sa e familia katar o Baasa, isto gia sar phendaia le o Del katar o profeta o Jeu,

¹³ pala o bilachipe kai cherda o Baasa ta leko chavo o Ela, kai cherde te cherel o bilachipe sa o foro katar o Israel ta joliarde e Devle, o Gazda katar o Israel.

¹⁴ Sa e ezgode kai cherda o Ela si pisime ando lil katar e charura e Israeleke.

¹⁵ Ando burs bis ta eftato katar o Asa, o charo ando Juda, thoda te charoil o Zimri, ta charoisarda efta llive ando Tirsa. Ta o foro thodape te marelpe e foroia katar Gibeton, o foro e filisteonengo.

¹⁶ Ta kana e boñikura kai sea ando pero asunde kai o Zimri mundarda e charo, isto gua llive thode e Omrie kai saia gazda e boñikonengo, te charoil ando Israel.

¹⁷ Ta o Omri ta sa o foro katar o Israel likiste katar o Gibeton, ta mardepe e foroia katar o Tirsa.

¹⁸ Ta kana dikhla o Zimri kai dobisarde, dia ando cher e charoinako, phabarda le ta ni likisto andral, ta gia mulo

¹⁹ pala ezgode bilache kai cherdaia angla o Del, ta i soke llelo po drom bilacho katar o Jeroboam kai cherda te cherel o bilachipe o Israel.

²⁰ Sa e ezgode kai cherda o Zimri ta sar vazdinailo po charo, si pisime ando lil katar e charura e Israeleke.

O Omri charoil ando Israel

²¹ Ondaka o foro katar o Israel fuladilo pe dui kotora. Nesave llana pala o Tibni chavo katar o Ginat te sai avel vou o charo, a aver llene llana pala o Omri.

²² A o foro kai llala pala o Omri saia mai zuralo neko gala kai llana pala o Tibni chavo katar o Ginat. Ta mulo o Tibni, ta charoisarda o Omri.

²³ Kana nakhle tranda ta iek burs sar kana o Asa charoila ando Juda, o Omri thoda te charoil ando Israel, ta charoisarda desudui burs. A ando Tirsa charoisarda sov burs.

²⁴ Ta o Omri chinda katar o Semer o burdo katar e Samaria pe dui talentura rupune. Ta vazdia po burdo iek foro kai ikharda le Samaria, o anav katar o lleno kai bichinda leke o burdo.

²⁵ Ta o Omri cherda o bilachipe angla o Del mai but neko sa e llene kai charoisarde mai anglal letar,

²⁶ soke cherda isto gola ezgode bilache kai cherda o Jeroboam chavo katar o Nabat, ta golea cherda i o Israel te cherel o bilachipe ta joliarde e Devle, o Gazda katar o Israel.

²⁷ Sa e ezgode kai cherda o Omri ta sar mardape ta sar dobisarda, si pisime ando lil katar e charura e Israeleke.

²⁸ Kana mulo o Omri, prajosarde le leke puranenchar ande Samaria, ta pe leko than charoisarda o Ajab leko chavo.

O Ajab charoil ando Israel

²⁹ Kana cherela tranda ta ojtoto burs kai charoila o Asa ando Juda, thoda te charoil ando Israel o Ajab, chavo katar o Omri.

³⁰ Ta o Ajab chavo katar o Omri, charoisarda ando Israel bis ta dui burs. Ta o Ajab cherda o bilachipe angla o Del, ios mai but neko sa ogola charura kai sea mai anglal letar,

³¹ soke ni chitilape leke niso te cherel e ezgode bilache kai cherda o Jeroboam chavo katar o Nabat. Ta zinisailo e Jezabelaia, chorri katar o Etbaal o charo katar e sidoniura, ta radisarda e deleke kai ikharen le Baal, ta blagosisarda le.

³² Ta cherda iek altar ta iek cher e Baaleke ande Samaria.

³³ Ta i cherda iek slik a katar e Astoret, gia o Ajab cherda mai but bilachipe neko sa e charura kai sea mai anglal letar, ta joliarda e Devle, o Gazda katar o Israel.

³⁴ Ande gua vreme o Jiel katar o Betel vazdia o Jeriko. Ta kana thovela e barra ande phuv te vazdel o foro, mulo leko chaurro mai purano o Abiram, ta kana thovela e udara katar o foro, mulo o Segub leko chaurro mai terno, gia sar phendaia le o Del e Josuetar chavo katar o Nun.