1 Relles 13 - Biblia ande chib Romani

Iek lleno bichaldo e Devletar katar o Juda del po Jeroboam

¹ Kana o Jeroboam phabarela o taimano po altar, avilo katar o Juda ando Betel iek lleno bichaldo e Devletar,

² ta ando baro avazi phenda gia o alav e Devleko: Altar, altar, gia phenel o Del: Ande familia e Davideki ka biandol iek minono kai ka ikharen le Josias, ta vou ka del kurbano upral pe tute e poponen kai phabaren o taimano pe thana vazdine, ta upral pe tute ka phabarel kokala manusenge.

³ Isto gua llive o lleno phenda kai ka dikhol iek bari ezgoda e Devletar, ta phenda: Gaia si e bari ezgoda kai ka cherel o Del: O altar ka zatrilpe ta o prajo e iagako kai si pe lete ka avel rispime.

⁴ Kana o charo o Jeroboam asunda e llene e Devleko kai diaia po altar ando Betel, inzarda po va ta phenda te phanden le, a o va kai inzarda chapenisailo ta nasti ortosarda le.

⁵ Ta o altar zatrisailo ta o prajo e iagako rispisailo, gia sar phendaia o lleno bichaldo e Devletar kai ka cherel le o Del.

⁶ Ondaka o charo avilo kai o lleno bichaldo e Devletar, ta phenda leke: Molisao e Devleke pala ma te sai sastol mo va. Ta o lleno molisailo e Devleke, ta o va e charoko sastilo ta achilo sargo omanglal.

⁷ Ta o charo phenda e lleneke kai saia bichaldo e Devletar.: Aide manchar chere, ka ja ta ka dav tut iek ezgoda.

⁸ A o lleno bichaldo e Devletar phenda e charoke: I te dea man dopas katar cho cher, me ni ka llav tuia ta ni ka jav marrno ta ni ka piav pai pe gava than,

⁹ soke o Del phenda mange: Na ja marrno, na pi pai, ta na irisao isto katar gua drom kai llelan.

¹⁰ Ta o lleno bichaldo e Devletar llelotar katar aver drom, te na irilpe isto katar gua drom kai lleloia ando Betel.

¹¹ Ande gua vreme zivila ando Betel iek profeta phuro, ta leko chavo avilo lete ta phenda leke sa so cherda o lleno e Devleko ando Betel, ta sa e alava kai phenda e charoke.

¹² Ta leko dad puchla le: ¿Katar savo drom llelotar? Ta leke chave phende leke katar savo drom llelotar o lleno e Devleko kai aviloa katar o Juda.

¹³ Ondaka phenda pe chavenge: Lacharen mange o magarcho. Ta leke chave lacharde o magarcho, ta o profeta likisto pe lete,

¹⁴ ta llelo pala o lleno e Devleko kai aviloia katar o Juda. Ta kana malada le besindo telal tala iek ensina, puchla le: ¿Tu san o lleno bichaldo e Devletar kai avilo katar o Juda? Vou phenda: Ea me sem.

¹⁵ O profeta phenda leke: Aide kai mo cher te ja manchar.

¹⁶ A o lleno phenda leke: Nasti ka iriv man tuia ta nasti llav tute, ni te jav marrno ta ni te piav pai pe gava than,

¹⁷ soke o Del phenda mange: Na ja marrno ta na pi pai kote, ta na irisao isto katar gua drom kai avilan.

¹⁸ A o phuro kojada le ta phenda leke: I me sem profeta sargo tu, ta iek suecho e Devleko phenda mange te inllarav tut kai mo cher ta te dav tut te ja ta te pie.

¹⁹ Ondaka llelo e phurea ta jala marrno lete, ta pila pai.

²⁰ Ta kana e dui sea pe sinia, o Del dia orba e phureke kai cherda te irilpe o lleno bichaldo e Devletar kai avilo katar o Juda,

²¹ ta o phuro bare avazea phenda e lleneke kai saia bichaldo e Devletar: Gia phenda o Del: Soke ni cherdan so me phendem chuke,

²² ta irisailan, jalan marrno ta pilan pai po than kai o Del phenda chuke te na chere le, ni ka prajon tut ando limori kai si che dada.

²³ Kana o profeta kai aviloia katar o Juda getosarda te jal marrno ta te piel pai, o profeta phuro kai cherdaia le te irilpe, lacharda leke o magarcho,

²⁴ ta kana llala po drom, iek liono mundarda le. Ta leki esnaga achili chudini po drom, ta pasa le o magarcho ta o liono.

²⁵ Ta nesave llene kai nakhle kotar dikhle e esnaga chudini po drom ta e liono pasa le. Ta kana avile ando o foro kai zivila o profeta phuro, phende leke so dikhle po drom.

²⁶ Ta kana asunda le o profeta kai cherdaia te irilpe o lleno bichaldo e Devletar katar o Juda, phenda: Vou si o lleno e Gazdako kai phagla o alav e Devleko. Goleke o Del cherda te mundarel le iek liono, isto gia sar phenda le o Del.

²⁷ Ta phenda pe chavenge te lacharen leke iek magarcho te sai llal, ta von lacharde leke o magarcho.

²⁸ Ta vou llelo ta malada e esnaga chudini po drom ta o magarcho ta o liono pasa le. O liono ni zatrisarda e esnaga ta ni jala e magarcho.

²⁹ Ondaka o phuro lia e esnaga katar o lleno e Devleko, thoda le upral po magarcho ta inllarda le pea ando foro te prajol le ta te rovel pala le.

³⁰ Ta prajosarda le ande piro limori, ta rovindo phenela: ¡Ioi, phlala!

³¹ Mapalal kana prajosarde le, o phuro phenda pe chavenge: Kana ka merav, prajon man ande gava limori pasa gava lleno kai prajosardem. Thoven me kokala pasa leke kokala,

³² soke istina ka cherdol so phenda vou ando anav e Devleko, kai o altar ando Betel ka avel zatrime ta i sa e thana vazdine ande Samaria.

³³ A o Jeroboam ni keisailo katar po bilacho drom, ta pale thoda poponen katar o foro pe thana vazdine, ta thovela popo pe gala thana vazdine ka vou mangela.

³⁴ Goleke sa e familia e Jeroboameki cherda o bilachipe, ta pala gua jasaili katar e phuv.