1 Relles 12 - Biblia ande chib Romani

E charoina fuladol

¹ O Roboam llelo ando Sikem, soke sa o Israel avilo ando Sikem te thovel le te charoil.

² Ta kana llangla le o Jeroboam chavo katar o Nabat, kai saia ando Ejipto sar kana naslo katar o Salomon,

³ bichalde llenen te ikharen le. Ta avilo o Jeroboam ta sa o foro katar o Israel te den orba e Roboamea, ta phende leke:

⁴ Cho dad saia but zuralo amenchar. Akana cher te avel mai lokho o pharipe kai thoda pe amende cho dad, ta amen ka radi chuke.

⁵ O Roboam phenda lenge: Llantar, aven mande pala e trin llive. Ta sa lleletar.

⁶ Ondaka o charo o Roboam puchla e puranen kai radisardea leke dadeke e Salomoneke kana saia llundo, ta phenda lenge: ¿So phenen tumen kai morabi te phenav e foroke?

⁷ A e phure phende leke: Te avea allive sargo lengo sluga ta te de lache orbe lenge, von ka radin chuke suako drom.

⁸ A o Roboam ni asunda len, ta puchla e chaurren kai barile lea ta kai radina leke so saia te cherel.

⁹ Ta puchla len: ¿So phenen tumen te phenav e foroke, kai mangle mandar te lav lendar o pharipe kai thoda pe lende mo dad?

¹⁰ Ta e chaurre phende leke: Gale foroke kai mangle tutar te le o pharipe kai thoda pe lende cho dad, tu morabi te phene lenge gia: Te saia mo dad zuralo tumenchar, me ka avav mai but neko vou. Mo nai mai minono si mai thulo neko me dadeko maskar.

¹¹ Mo dad thoda pe tumende iek baro pharipe, a me ka thovav ios pe so si thodo. Mo dad chalada tumen e bichoia, a me ka chalavav tumen e alakranenchar.

¹² Pala o trito llive o Jeroboam ta sa o foro kai saia lea avile kai o Roboam, isto gia sar phenda le o charo: Aven mande pala trin llive.

¹³ Ta o charo dia pe lende zurale, ta ni cherda so phende leke e phure.

¹⁴ Ta dia orba e foroia sar phendea leke e chaurre: Mo dad thoda pe tumende iek baro pharipe, a me ka thovav ios pe so si thodo. Mo dad chalada tumen e bichoia a me ka chalavav tumen e alakranenchar.

¹⁵ Ta o charo ni asunda e foro, soke gua saia e Devletar te sai cherdol o alav e Devleko kai diaia katar o Ajias silonita e Jeroboameke, chavo e Nabateko.

¹⁶ Kana sa o foro dikhla kai o charo ni asunda len, phende leke gia: ¡Inai amen niso e Davidea! ¡Ni ka la niso katar o chavo e Jeseeko! ¡Aventar chere! ¡Te arakhel o David pe familia! Ta e llene katar o foro lleletar kai pe chera.

¹⁷ A o Roboam charoisarda pe chave katar o Israel kai zivina ando Juda.

¹⁸ Ondaka o charo o Roboam bichalda e Adorame te lel e love kai pochindol e phuviake. A sa o Israel chalade le e barrenchar, ta mulo. Ta o charo o Roboam sigardo, lia iek bordon ta naslo ando Jerusalem.

¹⁹ Gia fuladilo o Israel katar e vicha e Davideki llik allive.

²⁰ Ta kana sa o Israel asunda kai o Jeroboam irisailo katar o Ejipto, ikharde le te avel ta thode le te charoil po Israel, ta ni iek vicha ni achili e familiaia katar o David, samo e vicha katar o Juda.

²¹ Ta kana o Roboam avilo ando Jerusalem chidia stotina ta ojtovardes milie boñikonen katar vicha e Judaeki ta katar e vicha e Benjamineki te marenpe e Israelea, ta te iril pale e charoina kai o Roboam, chavo e Salomoneko.

²² A o Del dia orba e Semaiasea, iek lleno e Devleko, ta phenda leke gia:

²³ Phen e Roboameke, chavo e Salomoneko charo katar o Juda, ta sa e familiake katar o Juda ta e familiake katar o Benjamin, ta sa e foroke,

²⁴ te na llan te maren tumen tumare phlalenchar e chave katar o Israel. Irin tumen chere, soke me cherdem gava. Kana asunde so o Del phenela lenge, irisaile chere prema o alav e Devleko.

O bilachipe katar o Jeroboam

²⁵ Ondaka o Jeroboam vazdia pale o foro katar o Sikem po burdo o Efraim, ta zivisarda kote. Mapalal vazdia pale o foro katar o Penuel.

²⁶ Ta o Jeroboam mislisailo: Akana e familia e Davideki pale ka charoil,

²⁷ te si kai e llene katar gava foro ka llan ando Jerusalem te den kurbanura e Devleke, pale ka volin e Roboame o charo katar o Juda, ta ka mundaren man ta ka irinpe kai o Roboam.

²⁸ Ta mapalal kana puchla so te cherel, cherda dui guruva sunakune, ta phenda e foroke: But droma tumen llelen ando Jerusalem. Etale kate che dela glamno Israel, von si kai ikande tut katar o Ejipto.

²⁹ Ta thoda iekhe ando foro Betel, ta ogole thoda le ando foro Dan.

³⁰ Ta gua saia baro bilachipe, soke o foro llala ando Betel ta ando Dan te blagosin e guruven.

³¹ Ta i o Jeroboam vazdia chera pe burdura, ta thoda poponen katar o foro kai ni sea katar e vicha e Levieki.

³² Ta phenda lenge te cheren slava ando ojtoto chon, ando desupanchto llive sar cherena le ando Juda, ta dia kurbano pe iek altar. Ta i gia cherda ando Betel, dia kurbanura e guruvenge kai vou cherda. Ta thoda poponen pe thana vazdine kai vou cherda.

³³ Dia kurbanura po altar kai cherda ando Betel, ando desupanchto llive katar o chon kai vou petar ikanda, ta cherda slava e chaveke katar o Israel, ta po altar phabarda o taimano.