1 Relles 11 - Biblia ande chib Romani

O Salomon blagosil avere delen

¹ O charo o Salomon volisarda e chea katar o Faraon, ta i volisarda bute diskinien katar o Moab, katar o Amon, katar o Edom, katar o Sidon ta katar e jititura.

² Diskinie katar e forura kai o Del phendaia te na zininpe lenchar, soke gala diskinie sai sikaven tumen te blagosin avere delen. A o Salomon zinisailo lenchar soke volisarda len.

³ Ta sea le efta stotine diskinie kai sea charoine, ta trin stotine konkubine. Ta leke diskinie boldie leko lio.

⁴ Ta kana o Salomon saia phuro, leke diskinie sikade le te blagosil avere delen, soke leko lio ni saia orta sargo o lio katar o David leko dad.

⁵ O Salomon blagosisarda e Astoreta, o del katar e sidoniura, ta blagosisarda e Milkome, o del gado katar e amonitura.

⁶ Ta o Salomon cherda o bilachipe angla o Del, ta ni llelo orta e Devlea sar cherda le leko dad o David.

⁷ Ondaka o Salomon cherda po burdo kai si pe rig kai likel o kham ando Jerusalem iek cher molimako e Kemoseke, o del gado katar e moabitura, ta i e Molokeke, o del gado katar e amonitura.

⁸ Gia cherda sa pe rromienge kai ni sea katar o foro e Israeleko, kai phabarena o taimano ta dena kurbanura avere delenge.

⁹ Ta o Del jolailo po Salomon, soke o lio e Salomoneko durilo katar o Del e Israeleko kai sikadilo leke dui droma,

¹⁰ ta phendaia leke te na blagosil avere delen. A vou ni cherda so phenda leke o Del.

¹¹ Ta o Del phenda e Salomonoke: Ni cherdan so phendem chuke, ni gurudan mo alav kai diem tut. Goleke, me ka lav tutar e charoina ta ka dav la che slugake.

¹² A pala o David cho dad kai voliv le, ni ka cherav le ande che llivesa. Ka lav le katar cho chavo.

¹³ Ta ni ka phagav sa e charoina, soke ka dav che chave iek vicha. Gua ka cherav le pala o David cho dad kai voliv le, ta pala o Jerusalem o foro kai esvirisardem.

¹⁴ Ta o Del cherda te avel e Salomone iek dusmano, o Adad, kai saia katar e vicha e charonengi ando Edom.

¹⁵ Soke kana o David saia ando Edom, o Joab gazda e boñikonengo, avilo te prajol e mulen, ta mundarda sa e murusen katar o Edom.

¹⁶ O Joab ta sa o Israel achile kote sov chon lligo ni mundarde sa e murusen katar o Edom.

¹⁷ Ta o Adad ta nesave sluge katar leko dad, nasle ando Ejipto. Ande gua vreme o Adad saia iek chaurro minono.

¹⁸ Avile katar o Madian llik kai o Paran. Kote lie slugen, ta avile kai o Faraon o charo katar o Ejipto, kai dia len cher, jape ta i dia len phuvia.

¹⁹ Ta o Faraon cherela but pala o Adad ta dia pe rromiake phea te zinilpe laia, e phei katar e charoina e Tajpenes.

²⁰ E phei katar e Tajpenes maladilo lake minono katar o Adad, ta ikharda le Genubat. Ta e Tajpenes bariarda le e chavenchar e Faraonoke, ando cher katar o Faraon.

²¹ Ta kana asunda o Adad kai muloa o David, ta kai i o Joab muloa, phenda e Faraoneke: Muk man te llautar kai mi phuv.

²² Ta o Faraon phenda leke: ¿Soke mange te iri tut kai chi phuv? ¿So inai tut manchar? Ta vou phenda: Niso. Me moliv man chuke, muk man te llautar.

²³ Ta i o Del cherda te avel aver dusmano e Salomonoke, o Rezon chavo katar o Eliada kai nasloia katar po gazda o Adad Ezer, o charo katar o Soba.

²⁴ O Rezon chidia peke llenen kochkaria, ta gazdarila pe lende. Kana o David mundarda gole llenen, o Rezon llelotar ando Damasko ta kote thode le te charoil.

²⁵ O Rezon saia dusmano katar o Israel sa e llivesa e Salomonoke. Ta vou saia aver bilachipe kai avilo e Salomonoke mapalal katar o Adad, soke murzila po Israel, ta charoisarda ande Siria.

²⁶ Ta i o Jeroboam chavo katar o Nabat, o efrateo katar o Sereda, kai saia sluga e Salomoneko ta kai leki dei saia iek phivli kai ikhardola Zerua, i vou cherdilo leko dusmano.

²⁷ O Jeroboam cherdilo o dusmano e Salomoneko soke kana o Salomon vazdia o Milo, phangla o udar katar o foro pe dadeko e Davideko.

²⁸ Ta gava Jeroboam saia but tromano ta zuralo. Ta kana dikhla le o Salomon kai saia iek lleno kai radila sukar, thoda le te arakhel o cher e Joseeko.

²⁹ Iek llive o Jeroboam likisto katar o Jerusalem ta po drom malada le o profeta o Ajias katar o foro Silo. Ta o Ajias saia uchardo ando iek gertachi nevo, ta e dui sea korkorre ando vos.

³⁰ Ta o Ajias lia o gertachi ta pharrada le pe desudui kotora,

³¹ ta phenda e Jeroboameke: Le chuke des kotora, soke gia phenda o Del katar o Israel: Me ka lav e charoina katar o Salomon ta ka dav tute des viche,

³² ta e Salomone ka avel le iek vicha pala o David mo sluga kai voliv le, ta pala o Jerusalem o foro kai esvirisardem maskar sa e viche katar o Israel,

³³ soke mukle man ta blagosin e Astoreta o del katar e sidoniura, blagosin e Kemose o del katar e moabitura, ta blagosin e Moloke, o del katar e amonitura, ta ni llan pe me droma, ta ni guruven me zakonura, sar cherda le o David leko dad.

³⁴ Ni ka lav letar sa e charoina, ka mukav le te charoil ande sa leke llivesa, pala o volipe kai si man po David mo sluga kai esvirisardem ta kai guruda me zakonura.

³⁵ A ka lav e charoina katar leko chavo, ta ka dav tute e des viche.

³⁶ Ta ka dav leke chave iek vicha, te sai avel iek lampara e Davideke ostade angla ma ando Jerusalem o foro kai me esvirisardem, te thovav mo anav kote.

³⁷ Me ka thovav tut te charoi ande sogo mangea, te sai ave o charo katar o Israel.

³⁸ Ta te cherea sa so ka phenav chuke, te llaia orta angla ma, ta te cherea so phenen me zakonura sar cherda le o David mo sluga, me ka avav tuia ta ka cherav te avel tut porodo baro, sar cherdem le e Davidea, ta ka dav tut o Israel.

³⁹ Ta pala so cherde, me ka pativ e Davideke chaven. A ni ka cherav le ostade.

⁴⁰ Goleke o Salomon mangla te mundarel e Jeroboame, a o Jeroboam naslo kai o Sisak o charo katar o Ejipto, ta kote achilo lligo ni mulo o Salomon.

Sar mulo o Salomon

⁴¹ Sa so cherda o Salomon, ta sa leko bizaipe ¿Inai pisime ando lil katar e ezgode kai cherda o Salomon?

⁴² O Salomon charoisarda ando Jerusalem pe sa o Israel, saranda burs.

⁴³ Ta kana mulo prajosarde le ando foro katar leko dad o David. Mapalal charoisarda leko chavo o Roboam.