1 Relles 1 - Biblia ande chib Romani

O phuripe e Davideko

¹ Kana o charo o David saia phuro ucharena le bute patavenchar soke ni lelape letar o sil.

² Ta leke sluge phende: Roden me gazdake o charo, iekhe chea te avel e charoia te sai sovel lea ta te del le tatipe.

³ Ta rodie iekhe chea sukar ande sa e phuv katar o Israel, ta malade e Abisaga e sunamita, ta ande la kai o charo.

⁴ Ta e chorri saia sukar. Voi ucharela e charo ta radila leke, a vou nikada ni amisailo laia.

O Adonias charoil bi te llanel o David

⁵ Ondaka o Adonias chavo katar o Jagit jolailo ta phenda kai vou ka charoil. Cherda bordona, ikharda llenen kai llan pe gra, ta pinda murusen te llan angla le.

⁶ O dad e Adoniaseko, nikada ni dia pe lete te phenel leke: ¿Soke chere gia? A o Adonias biandiloia mapalal katar o Absalon, ta vou saia but sukar.

⁷ O Adonias achiloia pe iek alav e Joabea, chavo katar o Sarvia, ta e popoia o Abiatar kai pomozina e Adoniase.

⁸ A o popo Sadok ta o Benaias chavo katar o Jodaia, o profeta o Natan, o Simei, o Rei, ta sa e llene kai uzdilape ando David, ni kamle te llan pala o Adonias.

⁹ O Adonias cherda iek jape pasa e pechina ando Zoelet kai achel pasa o pai katar o Rogel. Mundarda bakren, guruven ta telchonen e mai thule, ta ikharda pe phlalen, e chave katar o charo, ta sa e murusa katar o Juda kai radina e charoke.

¹⁰ A ni ikharda e profeta e Natane, ni e Benaiase, ni e tromanen katar o David, ta ni ikharda pe phlale e Salomone.

¹¹ Ondaka o Natan dia orba e Betsabeke, e dei katar o Salomon, ta phenda lake: ¿Ni llanglan kai o Adonias, o chavo katar o Jagit phenda kai akana vou si o charo, bi te llanel le o David amaro gazda?

¹² Akana asun man ta cher so me ka phenav chuke, te sai bradui tut ta i te bradui o zivoto katar cho chavo o Salomon.

¹³ Lla kai o charo o David ta phen leke gia: ¿Ni jalan sovel che slugake kana phendan gia: Cho chavo o Salomon ka charoil mapalal mandar, ta vou ka besel pe mo trono? ¿A soke akana charoil o Adonias?

¹⁴ Ta kana tu ka de orba e charoia, me ka dav andre palal pala tu ta ka phenav kai so phene tu si o chachipe.

¹⁵ Ondaka e Betsabe dia ande soba e charoki. Ta o charo saia but phuro, ta e Abisag e sunamita radila leke.

¹⁶ Ta e Betsabe dia tenemava angla o charo. Ta o charo puchla la: ¿So si chuke?

¹⁷ Ta voi phenda leke: Mo glamno gazda, tu jalan sovel che slugake ando anav e Gazdako cho Del, kai mo chavo o Salomon ka charoil mapalal tutar, ta kai vou ka besel pe cho trono.

¹⁸ Ta akana o Adonias charoil, a tu mo glamno charo ni llane le.

¹⁹ Mundarda bute guruven, telchonen, ta bakren. Ikharda po jape e chaven katar o charo, e popo o Abiatar, e Joabe gazda e boñikonengo. A che sluga e Salomone ni ikharda.

²⁰ Mo glamno charo, sa o foro katar o Israel aduricharel te phene ko ka besel pe cho trono mapalal tutar.

²¹ Soke te na phendan le, kana tu ka sove che dadenchar, ka phenen kai me ta mo chavo o Salomon sam dosale.

²² Ta kana voi dela orba e charoia, avilo o profeta o Natan.

²³ Ta phende e charoke kai avela o profeta o Natan. Ta kana o Natan avilo, dia changenchar angla o charo lligo ni dodisarda pe phuv pe chikatea,

²⁴ ta o Natan puchla le: Mo glamno charo, ¿Tu phendan gia: o Adonias ka charoil mapalal mandar ta ka besel pe mo trono?

²⁵ Soke vou allive mundarda bute guruven, telchonen, ta bakren te cherel iek jape, ta ikharda e chaven katar o charo, e gazden katar e boñikura ta e popo o Abiatar. Ta etalen kote, jan, pien ta urkin: ¡Te zivil o charo o Adonias!

²⁶ A ni ikharda man kai sem cho sluga, ni e popo e Sadoke, ni e Benaiase chavo katar o Joiada, ni e Salomone.

²⁷ Mo glamno charo, ¿Tu cherdan te avel o Adonias o charo bi te phene le che slugenge ko saia te besel po trono mapalal tutar?

O Salomon chinado te avel o charo

²⁸ Ondaka o charo o David phenda te ikharen e Betsabea. Ta kana voi avili lete, achili pe porrne angla le.

²⁹ Ta o charo jala sovel gia: Ando anav e Devleko kai braduisarda man katar sa e brige kai nakhlem,

³⁰ sogo jalem sovel ando anav e Devleko katar o Israel, ka cherav le isto allive. Cho chavo ka charoil mapalal mandar, ta vou ka besel pe mo trono.

³¹ Ondaka e Betsabe dia changenchar angla o charo ta bangili llik pe phuv, ta phenda: ¡Te zivil ostade mo gazda o charo o David!

³² Ta o charo phenda te ikharen e popo e Sadoke, e profeta e Natane ta e Benaiase chavo katar o Joiada. Ta von avile angla o charo.

³³ Ta o charo phenda: Len tumen e slugen katar tumaro gazda, thoven me chave e Salomono pe murni magarcha, ta inllaren le ando Gijon.

³⁴ Kote o popo o Sadok ta o profeta o Natan ka thoven zeitino pe leko soro, ta ka thoven le charo katar o Israel, ta ka basalen e tuturuge ta ka urkin: ¡Te zivil o charo o Salomon!

³⁵ Mapalal tumen ka llan palal pala le, ta vou ka avel ta ka besel pe mo trono, ta ka charoil pe mo than, soke me esvirisardem le te avel vou o gazda ande phuv katar o Israel ta o Juda.

³⁶ Ondaka o Benaias chavo katar o Jodaia phenda e charoke: ¡Gia te avelpe! ¡Gia te phenel le o Del, o Del me gazdako o charo!

³⁷ Ta isto gia sar o Del si e charoia, te avel e Salomonea, ta te bariol e charoina ios mai but neko e charoina katar mo glamno gazda o David.

³⁸ Ta o popo o Sadok, o profeta o Natan, o Benaias chavo katar o Jodaia, e kereteura ta e peleteura, thode e Salomone pe magarcha katar o David ta inllarde le ando Gijon.

³⁹ Kote o popo o Sadok lia e sing e zeitinoki katar e chara e Devleki ta thoda o zeitino po Salomon. Basalde e tuturuga ta sa o foro phenda: ¡Te zivil o charo Salomon!

⁴⁰ Mapalal sa o foro llelo palal pala le ta llilabena prema e firura. E veselia saia gia bari kai e phuv dikhola sargo kana phagola pala lengo urkipe.

⁴¹ Ta o Adonias ta e gostura kana getosarde te jan, asunde e tuturuga ta o Joab puchla: ¿Soke si gaia burkania ando foro?

⁴² Kana o Joab dela orba, avilo o Jonatan chavo katar o popo o Abiatar, ta o Adonias phenda leke: Nak andre, soke tu san iek lleno tromano ta ane amenge lachi viasta.

⁴³ O Jonatan phenda e Adoniaseke: Iok, ni anav lachi viasta, soke amaro gazda o charo o David thoda te charoil e Salomone,

⁴⁴ ta o charo bichalda e popo e Sadoke, e profeta e Natane, e Benaiase chavo katar o Joiada, e kereteonen ta e peleteonen te llan e Salomonea. Ta von thode le pe magarcha katar o charo

⁴⁵ a o popo o Sadok ta o profeta o Natan thode pe leko soro o zeitino ta cherde le charo ando Gijon, mapalal irisaile kotar but vesele. Goleke ando foro si e bari burkania kai tumen asunen,

⁴⁶ ta i o Salomon beslo po trono katar e charoina,

⁴⁷ ta e sluge e charoke llele te blagosin e Davide ta te phenen leke, te bariarel o Del o anav katar o Salomon mai but neko o anav e Davideko, ta i te avel leko gazdaripe mai baro. Ta o charo pe po kerveto blagosisarda e Devle,

⁴⁸ ta i phenda: Blagosime te avel o Del e Israeleko, kai allive dia iekhe llene te besel pe mo trono, ta me dikhav le.

⁴⁹ Ondaka e llene kai o Adonias ikharda po jape daraile but. Sa ustile, ta suako lleno llelotar kai po cher.

⁵⁰ O Adonias darailo katar o Salomon, ustilo ta naslo kai e chara e Devleki ta istardilo pe singa katar o altar.

⁵¹ Iek lleno llelo ta phenda e Salomoneke: O Adonias daral katar o charo o Salomon ta istardilo pe singa katar o altar, ta phenel te jal leke sovel o Salomon kai ni ka mundarel le.

⁵² Ta o Salomon phenda: Te avela vou iek lleno posteno, ni iek katar leke bal ka perel pe phuv, a te avela vou bilacho, ka merel.

⁵³ Ondaka o charo o Salomon phenda te anen e Adoniase katar o altar, ta vou avilo ta dia changenchar angla o charo o Salomon. Ta o Salomon phenda leke te llaltar chere.