1 Pedro 5 - Biblia ande chib Romani

E orba golenge kai gazdarin ande khanlliri

¹ Akana mangav te phenav golenge kai gazdarin ande tumari khanlliri kai me sem sargo tumen ta i kai dikhlem e patnia kai nakhlo o Kristo. Kana vou ka avel pale ka avav lea ande leko baripe.

² Arakhen e bakren kai o Del dia tumende, arakhen len chache liea, na samo soke si te arakhen len pala e love, arakhen e bakren e Devleke chachimaia.

³ Na sargo kana gazdarin pe llene kai o Del dia tumende, so morabi te cheren si te aven lache lenchar, ta gia von ka sikon tumendar.

⁴ Ta gia kana ka avel o Chobano kai si o Gazda mai baro, ka del tumen e korona blagosimaki kai nikada ni ka merel.

E orba sa e khanllirake

⁵ Isto gia tumen e terne morabi te kanden golen kai gazdarin ande khanlliri ta te kanden iek avere postenimaia, ta na te istardon soke: E Devleke inai drago e llene kai istardon, a pomozil e llenen kai lengo lio si kovlo.

⁶ Goleke morabi te aven proste angla o Del soke sen tala leko va, ta vou ka del tumen o baripe kana ka avel o vreme.

⁷ Muken ande Devleke va sa tumare brige, soke vou arakhel tumen.

⁸ Arakhen tumen ta thoven sama soke o llavolo llal sargo iek liono divome kai rodel so te jal.

⁹ Ta terpin leke zurale ando pachape soke tumen llanen kai ande sa e phuvia si but phlal kai nakhen patnia isto sargo tumen.

¹⁰ A kana tumen ka nakhen gaia patnia nesavo vreme o Del ka cherel tumen orta ta zurale te na kovlion ta gia suako llive ka avel tumen pachape. Isto o Del kai ande po baro volipe ikharda amen e Jesukristoia te ava i amen ande leki dragostia ostade.

¹¹ Leke te avel e zor ostade. Gia te avelpe.

¹² O Silvano kai mange si iek phlal chacho pomozisarda man te pisiv tumenge gava lil te sai sikon. Me phenav kai sa so dia tumen o Del si soke volil tumen but. ¡Goleke achen zurale ande gava volipe!

¹³ E khanlliri kai si ande Babilonia, kai o Del esvirisarda ta kai i tumen esvirisarda, bichalel tumenge salami ta i mo chaurro o Markos.

¹⁴ Chumiden tumen iek avere volimaia. Te avel tumen pas sa tumen kai sen e Kristoke.