1 Pedro 2 - Biblia ande chib Romani

O foro nevo e Devleko

¹ Muken o bilachipe kai cheren. Na kojaven, te na joliaon kana averenge llal sukar na den orba bilachi katar aver llene.

² Isto gia sargo e minone kai mangen o thut katar pi dei, mangen i tumen o thut kai si e lachi viasta, te barion ta i te aven braduime,

³ soke llanen kai o Del si lacho.

⁴ Aven kai o Gazda, soke vou si o barr llundo kai e llene ni thode leke sama, a o Del esvirisarda le sargo o barr mai kuch.

⁵ Isto gia o Del ka cherel tumen sargo barra llunde te vazdel iek cher Duoko e Devleko; ta tumen ka aven leke popura sante ta pala o Jesukristo ka den kurbanura Duoke kai peren drago e Devleke.

⁶ Goleke phenel ando Pisipe: Me thovav ando Sion iek barr kai gua si o barr mai preche, o barr esvirime ta but kuch, kogo ka avel le vera ande le, ni ka acharelpe kojado.

⁷ Tumenge kai pachan, gua barr si but kuch, a golenge kai ni pachan, cherdol so phenel o Pisipe: O barr kai e llene kai vazdena e chera ni thode leke sama, cherdilo o barr mai preche.

⁸ Ta i phenel o Pisipe: Gava si o barr kai ka cherel te peren but llene. Soke von ni thode sama ande lachi viasta, goleke peren.

⁹ A tumen akana sen o foro santo e Devleko, e popura chachune kai radin e charoke. Gua si te sai sikaven e bare ezgode kai cherda o Del; te liken katar o truniariko ta te aven karing o villelo.

¹⁰ Omanglal tumen ni sena niso, a akana sen foro e Devleko; omanglal o Del ni prostila tumaro bilachipe, a akana vou volil tumen.

E lache ezgode kai morabi te cheren e kristianura

¹¹ Phlalalen, me dav orba tumenchar sargo llenenge katar aver sueto kai samo nakhen pe gaia phuv. Na cheren niso bilacho soke te cherena le, ka peren ando jasardipe.

¹² Te aven lache e llenenchar kai ni pachan ando Del. Golea, gala llene kai akana den orba bilachi tumendar, ka dikhen o lachipe kai cheren tumen ta ka blagosin e Devle ando llive e krisako.

Liubao e sudonenchar

¹³ Te avel tumenge liubao e sudonenchar, gia te na den orba bilachi katar o Jesukristo. Kanden e kralio, soke vou si kai gazdaril,

¹⁴ kanden e sudonen kai o kralio thoda te patin gole llene kai cheren bilachipe ta te den liubao golen kai cheren lachipe.

¹⁵ Soke o Del mangel tumendar te aven lache, te na den orba bilachi tumendar e dile.

¹⁶ Llan tumen sargo llene kurtulime, ta na mislisaren soke sen kurtulime sai cheren sogo kamen, mai sukar zivin sargo esluge e Devleke.

¹⁷ Te avel tumende liubao saurrenchar. Volisaren e phlalen, den changa angla o Del, den liubao e kralio.

So morabi te cheren e sluge

¹⁸ Esluge, kanden tumare gazden, na samo e lachen kanden i e gazden bilache.

¹⁹ Soke o Del blagosil gole llene kai bi nusdatar murzin pe lende.

²⁰ Soke te nakhen patnia pala fiso bilacho kai cherden, ¿so ka dobin te terpin e patnia? A te cheren o lachipe ta nakhen patnia, sukar si te terpin e patnia soke gua si drago e Devleke.

²¹ Pala gua ikharda tumen o Del, soke o Kristo nakhla patnia pala tumende, ta phenda kai morabi te cheren gia sar cherda vou.

²² O Kristo nikada ni cherda niso bilacho ta ni kojada nikake.

²³ Kana kusena le, vou ni phenela niso; ta kana patina le, ni dela armaia soke molilape e Devleke ta mangela letar te arakhel le.

²⁴ O Kristo inllarda amaro bilachipe ande pi esnaga po krusto, te sai amen kai sama mule ande amaro bilachipe te zivi e chachimake, ta pala leko mas ranime te ava amen sastarde.

²⁵ Omanglal tumen llana sargo bakre jasarde, a akana irisailen karing o Kristo kai vou si o chobano kai arakhel tumaro zivoto.