1 Kronikas 5 - Biblia ande chib Romani

E chave katar o Ruben

¹ O Ruben saia o chavo mai purano e Israeleko, a jasarda so saia te lel o chavo mai purano soke sovto pe dadeke rromiaia. Goleke die e chaven katar o Jose so saia te lel vou,

² makar o Juda cherdilo o chavo mai zuralo maskar sa e phlal, so saia te lel o Ruben, lia le o Jose.

³ E chave katar o Ruben o chavo mai purano e Israeleko sea, o Janok, o Falu, o Jesron ta o Karmi.

⁴ E chave katar o Joel sea, o Semaias, o Gog, o Simei,

⁵ o Mikaia, o Reaia, o Baal,

⁶ o Beera kai phangla le o Tiglat Pileser, charo katar e Asiria. O Beera saia o gazda katar e rubenitura.

⁷ E phlal katar o Beera prema lenge familie sea len gazda, gala sea o Jeiel o Zakarias,

⁸ ta o Bela chavo katar o Azaz, unuko katar o Sema, chavo katar o Joel. O Bela zivisarda ando Aroer llik o Nebo ta Baal Meon.

⁹ Ta i zivisarda katar e rig kai likel o kham llik pasa o pusto katar o Eufrates, soke sea len but zivirinie ande phuv katar o Galaad.

¹⁰ Kana charoila o Saul e rubenitura mardepe e agarenurenchar ta dobisarde len, ta thodepe te zivin pe rig katar likel o kham ande phuv katar o Galaad.

E chave katar o Gad

¹¹ E chave katar o Gad kai zivisarde angla e rubenitura, ande phuv katar o Basan llik kai o foro o Salka,

¹² sea o Joel o purvo, mapalal o Safan, mapalal o Jaanai, mapalal o Safat.

¹³ Lenge phlal prema lenge familie sea, o Mikael, o Mesulam, o Seba, o Jorai, o Jakan, o Zia ta o Eber. Von sea efta.

¹⁴ Gala sea e chave katar o Abijail, chavo katar o Juri, chavo katar o Jaroaj, chavo katar o Galaad, chavo katar o Mikael, chavo katar o Jesisai, chavo katar Jajdo, chavo katar o Buz.

¹⁵ O Aji chavo katar o Abdiel ta unuko katar o Guni, saia o gazda katar leke familie.

¹⁶ Sa gola zivisarde ando Galaad, ando Basan, ande forichura ta ande bare umalia kai si ando Saron llik kai resel lengi phuv.

¹⁷ Sa golen pisisarde len ando lil e familiako ando vreme katar o Jotam, charo katar o Juda ta o Jeroboam, charo katar o Israel.

E dui viche ta dopas vicha

¹⁸ E chave katar o Ruben ta o Gad ta o dopas vicha katar o Manases, sea boñikura tromane kai saia len eskudo, jarni, arko ta llanena sukar te marenpe. Von sea saranda ta star milie ta efta stotine ta sovardes boñikura.

¹⁹ Mardepe e agarenurenchar, e boñikonenchar katar o Jetur, o Nafis ta o Nodab.

²⁰ Ta kana marenape, molisaile e Devleke ta o Del cherda te dobin e agarenuren ta sa e llenen kai sea e lenchar.

²¹ Mapalal lie katar pe dusmanura pinda milie deve, dui stotine ta pinda milie bakre, ta dui milie magarchura. Ta i phangle stotina milie llenen.

²² But llene mule soke o maripe saia e Devletar. Ta achile te zivin ande gola thana llik kana inllarde len phangle saurren.

²³ E chave katar e dopas vicha e Manaseseki zivisarde ande phuv kai si katar o Basan llik kai o Baal Jermon, o Senir ta o burdo o Jermon, soke sea but llene.

²⁴ E gazda katar lenge familie sea o Efer, o Isi, o Eliel, o Azriel, o Jeremias, o Odavias ta o Jajdiel. Sa sea boñikura tromane, murusa pinllarde ta gazda katar pe familie.

²⁵ A cherde o bilachipe angla o Del lenge puranengo, ta blagosisarde e delen katar e forura kai o Del zatrisarda angla lende.

²⁶ Goleke o Del cherda te avel o Pul charo katar e Asiria, cherda te avel o Tiglat Pileser charo katar e Asiria te marelpe e rubenitonenchar ta e gaditonenchar ta e llenenchar katar e dopas vicha e Manaseseki. Dobisarda len ta inllarda len phangle ando Jalaj, Jabor, Ara ta pasa o pai katar o Gozan, kote kai zivin llik akana.