1 Kronikas 21 - Biblia ande chib Romani

David llinel e foro

¹ Ta o satanas cherda te phenel o David te llinen e llenen katar o foro o Israel.

² Ondaka o charo phenda e Joabeke ta e llenenge kai gazdarina po foro: Llan kai sa e viche katar o Israel, katar o Berseba llik kai o Dan te llinen e foro te llanav gachin llene si.

³ A o Joab phenda: Te del o Del te bariol leko foro stotina droma mai but neko so si akana, glamno charo. ¿Inai sa gala llene che sluge? ¿Soke te avel o Israel dosalo?

⁴ A o alav e charoko saia mai zuralo neko o alav e Joabeko. Goleke o Joab llelo pe sa e phuv katar o Israel te sai llinel e foro, mapalal irisailo ando Jerusalem.

⁵ Ta o Joab phenda e charoke gachin llene sea ande sa e phuv. Ando Israel sea millono ta stotina milie murusa kai sai llana po maripe, ta ando Juda star stotine ta eftavardes milie murusa kai sai llana po maripe.

⁶ A ni llinde e llenen kai sea ande viche katar o Levi ta o Benjamin soke ni saia drago e Joabeke so cherela o charo.

⁷ Ta gaia ezgoda ni pela drago e Devleke, goleke dukhada e Israele.

⁸ Mapalal o David phenda e Devleke: Devla, cherdem iek baro bilachipe. Mangav tutar Devla te prosti man pala so cherdem, soke cherdem iek dilipe.

⁹ Ondaka avilo o alav e Devleko e Gadeke, kai saia iek lleno kai o Del phenela leke so saia te cherel o David, ta phenda:

¹⁰ Lla ta phen e Davideke kai trin ezgode si man te dav le. Te phenel savi katar e trin mangel, ta me ka cherav le.

¹¹ Ondaka o Gad llelo kai o David ta phenda leke e orbe e Devleke: Gia phenel o Del:

¹² Esvirisar: Trin burs te avel e bok, o te dobin tut e jarniea trin chon che dusmanura ta von te roden tut, o te avel ande chi phuv trin llive iek bari muka kai si o jarni e Devleko, ta te zatril sa e phuv o suecho e Devleko. Mislisao ta phen mange so esvirisardan, te phenav le goleke kai bichalda man.

¹³ Ta o David phenda e Gadeke: Sem but dukhado. Mai sukar si te pera ande Devleke va soke vou si but lacho, a na te pera ande va e manusenge.

¹⁴ Ondaka o Del cherda te avel iek bari muka ando Israel ta mule eftavardes milie llene.

¹⁵ Ta o Del bichalda iek suecho te zatril o Jerusalem. Ta kana o suecho zatrila, avila zalba e Devleke ta phenda e suechoke: ¡Dosta akana, achi! Ta o suecho e Devleko saia po than kai moren o lliu kai saia katar o Ornan o jebuseo.

¹⁶ Ta o David dikhla kai o suecho e Devleko saia maskar o miloso ta e phuv, ta ande leko va iek jarni inzardo po Jerusalem. Ondaka o David ta e phure thodepe patave zalosne, ta die changa.

¹⁷ Ta o David phenda e Devleke: ¡Me bichaldem te llinen e foro! ¡Me sem gua kai cherda o bilachipe! ¿A so cherde gala llene bi dosale? ¡Te perel e duk pe ma ta pe mi familia!

O David vazdel iek altar

¹⁸ Ondaka o suecho e Devleko phenda e Gadeke te phenel e Davideke te vazdel iek altar e Devleke po than kai moren o lliu katar o Ornan o jebuseo.

¹⁹ Ta o David llelo te cherel so phendaia leke o Gad ando anav e Devleko.

²⁰ Kana o Ornan drebola o lliu dikhla e suecho e Devleko, goleke star katar leke chave kai sea lea gurudile.

²¹ Ta o Ornan dikhla kai avela o David, ta likisto katar o than kai moren o lliu ta dia changenchar angla le,

²² Ta o David phenda leke: Me avav te chinav tutar chi phuv te sai vazdav iek altar e Devleke. Me ka pochinav chuke so mol le, gia ni ka meren ios llene ando foro.

²³ Ta o Ornan phenda e Davideke: Mo glamno charo, le sogo mangea te de kurbano phabardo e Devleke. Kate si guruva, e kasta ta o lliu e kurbanoke. ¡Sa me dav len tute, mo glamno charo!

²⁴ Ta o charo phenda e Ornaneke: Iok, me ka chinav le pe so mol le. Ni ka lav tutar niso te dav le kurbano e Devleke ta kai ni pochindem niso pala le.

²⁵ Ondaka o David pochinda e Ornaneke pala gua than sov stotine tolaria sunakune.

²⁶ Ta o David vazdia kote iek altar e Devleke, ta dia kurbanura phabarde ta ofrende pala e pas. Ta o Del asunda o molipe e Davideko ta bichalda iag katar o miloso po altar kai phabarena o kurbano.

²⁷ Ondaka o Del dia orba e suechoke, ta o suecho guruda po jarni.

O than te cherdol o cher e Devleko

²⁸ Ta kana o David dikhla kai o Del asunda le ande umal katar o Ornan jebuseo, dia kurbanura kote.

²⁹ Ta e chara e Devleki kai vazdiaia o Moises po pusto ta o altar e kurbanoko, sea po than vazdino ando Gabaon.

³⁰ Ta o David ni llelo incha te puchel e Devle soke darailo but kana dikhla o jarni katar o suecho e Devleko.