1 Korintios 9 - Biblia ande chib Romani

So sikavel o Pablo

¹ Me sai cherav sa so cherel iek apostol, soke dikhlem e Jesuse amaro Gazda, ta pala mo rado kai cherav e Gazdake tumen sen e Kristoke.

² Sai avelpe kai averenge me ni sem apostol, a tumenge me sem apostol, tumen pachan ando Kristo ta gua sikavel kai chachimaia me sem apostol.

³ Asunen so phenav gole llenenge kai janpe manchar:

⁴ I amenge llalpe te den amen jape ta pipe,

⁵ ta i te inllara amenchar amare rromien kai pachan ando Kristo, gia sar cheren le ogola apostolura, ta e phlal e Gazdake, ta i o Sefas.

⁶ ¿A sai avelape kai samo e Bernabee ta man nasti pravaren?

⁷ Ni iek boñiko ni pravarel vou pe. Ko radil ande drakha jal katar e drakha, ta ko arakhel e busnien piel o thut kai ikanen lendar.

⁸ Gaia inai iek orba murni, gava si so sikavel o Pisipe.

⁹ Soke ando zakono kai pisisarda o Moises phenel gia: Na achaven te jal e guruve kana ustavel ta trebol o lliu Ta gava inai kai o Del brigilpe katar e guruva,

¹⁰ gava si soke o Del brigilpe amendar soke o zakono pisisailo cheres amende, llik e llene kai lacharen e phuv ta i gola kai trebon o lliu pachan kai si len iek isi.

¹¹ Isto gia amen kana phendam tumenge e lachi viasta, si sargo kana thodam iek simicha duoki ande tumende. Goleke, cheres amaro rado amen si te la tumendar so trubul amen te zivi.

¹² Te cheren gala ezgode avere llenenchar, ios mai but morabi te cheren le amenchar. A gala ezgode kai saia te cheren amenchar amen ni kamlam tumendar te cheren le, ta amen suako ezgoda terpisardam te na achava e lachi viasta e Kristoki.

¹³ Tumen llanen kai gola kai radin ando cher e Devleko, pravarenpe katar o cher e Devleko. Goleke, gola kai radin pe rig kai denpe e kurbanura, jan katar gua mas kai diape kurbano.

¹⁴ Isto gia, o Gazda mukla gala alava e llenenge kai phenen e lachi viasta te zivin isto katar e lachi viasta.

¹⁵ A me nikada ni phendem te cheren manchar gia, ta ni pisiv tumenge te den man vareso. Mai lache te merav a na te len mandar gaia dragostia kai si man.

¹⁶ Me ni phenav e lachi viasta te faliu man, cheraule soke o Del phenda mange te cheraule. ¡Ta tesko mange te na phenava e lachi viasta!

¹⁷ Goleke, me nasti aduricharav te pochinen mange te phenav e lachi viasta, soke niko ni mangla te cherav le. Chereav le soke o Del phenda mange te cherav le.

¹⁸ A ondaka so dobisarav me, si e dragostia te phenav e lachi viasta e Kristoki llabe, ta ni phenav kai mai anglal morabi te ziviu katar e lachi viasta soke sem apostol.

¹⁹ Goleke, i te na avava phanglo pe nika, cherdilem esluga saurrengo, te sai anav mai but llenen te pachan ando Kristo.

²⁰ Kana sema maskar e judiura cherdilem sargo iek judio te sai pomoziu golen kai si tala o zakono e Moiseseko, te pachan ando Kristo. Isto me thodem man tala o gua zakono kana chachimaia me ni sem phanglo pe lete.

²¹ A gole llenenchar kai ni zivin tala o zakono e Moiseseko, cherdilem sargo iek lendar. A chachimaia me sem phanglo po zakono e Devleko, soke sem tala o zakono e Kristoko.

²² Kana sema maskar e llene kai si kovle ando pachape cherdilem kovlo sargo iek lendar te sai pomoziu len. Sargo te avela, cherdilem sar si suako lleno te sai pomoziu te aven braduime nesave lendar.

²³ Sa gala ezgode cherav len pala e lachi viasta, te sai avel man isi laia.

²⁴ Tumen llanen kai kana sa prasten samo iek dobisarel. Goleke morabi tumen te prasten sar trubulpe te sai dobisaren.

²⁵ Gola kai lacharenpe te chelenpe pe varesavi ezgoda, arakhenpe katar suako ezgoda te na jasaren pi zor te sai dobin iek korona patrengi kai but oma murilpe, a amen cherale te dobisara so ni ka murilpe nikada.

²⁶ A me ni prastav bi te llanav kai llau ta ni marav man sargo kana dav dumukha ande balav.

²⁷ Me dukhavav mi esnaga te sai cherav la te kandel man pe zor te na avav me ikando katar o prastipe kana me sikadem averen.