1 Korintios 8 - Biblia ande chib Romani

O kurbano ta o jape avere delenge

¹ A cheres o jape kai den le kurbano avere delenge. De istina si so phenen e llene: kai saurre llana so si o chachipe, a o llanglipe cherel amen te istardiva, a o volipe del amen zor.

² Te mislilape vareko kai llanel vareso, ni llanel niso sar saia te llanel le.

³ A vareko te volil e Devle, gole pinllarel o Del.

⁴ A cheres e orba te jalpe o jape kai del pe kurbano avere delenge, saurre llana kai gola dela inai len zivoto ta kai samo iek Del si.

⁵ I te avena nesave kai ikharenpe dela ando miloso o pe phuv, gia sar si but dela ta but gazda,

⁶ a amenge si samo iek Del, o Dad, kai cherda sa e ezgode, ta amen leke zivi. Ta si samo iek Gazda, o Jesukristo, kai letar sa e ezgode cherdile, ta fala leke amen zivi.

⁷ Na saurre pinllaren o chachipe. Ta nesave kai sea sikade te blagosin avere delen, llik akana jan katar gua jape soke mislinpe kai gua jape diele kurbano gole delenge, ta lengi golli kai si kovli, cherel len te mislinpe kai achile melale katar gola dela.

⁸ Bristo si kai o Del lel amen na pala so ja, soke ni ka ava mai lache cheres so jaia, ta ni ka ava mai bilache cheres so ni jaia.

⁹ Arakhen tumen so sikilen akana, gava te na cherel te peravel ando bilachipe golen kai si kovle ando pachape.

¹⁰ Soke tu, kai llane gala ezgode, te besea te ja pe iek sinia kai si thodi avere delenge, ta varesavo phlal kai si kovlo ando pachape te dikhela tut kai ja, i vou ka mangel te jal pe goia sinia kai die kurbano avere delenge.

¹¹ Ta gia tu, soke llane gala ezgode, chere che phlale kai si kovlo ando pachape te jasaol, kai i pala le mulo o Kristo.

¹² Kana chere che phlalen te peren katar po pachape, gava bilachipe cheren le isto e Kristoke.

¹³ Goleke, te cherava te perel me phlale ando bilachipe pala o jape, morabi te na jau mas nikada, te na cherav le te perel.