1 Korintios 7 - Biblia ande chib Romani

So morabi te cheren e zinime

¹ Ando lil kai bichalden mange puchlen man dal si sukar te na zininpe e llene. Sukar avela te na zininpe,

² a cheres o kurvaluko avela mai sukar suako murus te avel le leki rromi, ta suako diskinia te avel la lako rrom.

³ Ta o rrom morabi te perel peke samo pe rromiaia, ta e rromi samo pe rromea.

⁴ Ni e rromi inai gazda katar pi esnaga, soke laki esnaga si lake rromeki, ni o rrom inai gazda katar pi esnaga, soke si lake rromiaki.

⁵ Goleke, na phenen iok iek avereke, samo kana achena pe orba ande gola llivesa te na peren peke e dui ande iek than te sai molintumen, ta pala gola llivesa morabi te peren peke e dui pale ande iek than ta gia o Satanas te na cherel tumen te peren ando bilachipe.

⁶ Sa gala orbe si so misliu man me, na sargo iek zakono kai morabi te cheren.

⁷ Me manglema sa te aven sargo me, a o Del dia suakone llene so te cherel, iekhe iek ezgoda, avere aver ezgoda.

Aver ezgode

⁸ Gola kai inai zinime ta e diskinie kai achile phivle, phenav lenge kai si mai sukar te na zininpe sargo me.

⁹ A te nasti achavenpe, mai sukar avela te zininpe a na te phabon.

¹⁰ A golenge kai si zinime mukau gava zakono, kai inai murno, e Gazdako si: E rromi te na mukelpe pe rrometar.

¹¹ A iek rromi te mukelape katar po rrom, morabi te achel mukli ta te na zinilpe o te lachardol pe rromea. Isto gia o rrom, morabi te na mukelpe katar pi rromi.

¹² A ogole llenenge phenav gala alava kai si murne a na e Gazdake, varesavo phlal kai leki rromi ni pachal ando Gazda ta voi mangel te zivil lea, o phlal morabi te na mukelpe latar.

¹³ A te avela iek rromi kai si zinime ta lako rrom ni pachal ando Gazda ta vou mangel te zivil laia, voi morabi te na mukelpe letar.

¹⁴ Soke o rrom kai ni pachal ando Gazda achel santo cheres pi rromi kai pachal, a e rromi kai ni pachal ando Gazda achel santa cheres lako rrom kai pachal. Te na avela gia tumare chaurre avena melale, ta pala gua von si akana katar o foro santo.

¹⁵ A kana o rrom kai ni pachal ando Gazda ta si zinime iekhe diskiniaia kai pachal ta mangela te mukelpe, sai cherel le, ta isto gia e diskinia kai ni pachal ando Gazda, te mangela te mukelpe katar po rrom kai pachal, sai cherel le. A te si gia, o rrom o e rromi kai pachan inai phangle te zivin lenchar soke o Del ikharda tumen te zivin ande pas.

¹⁶ ¿A so llane tu, rromie, kai sai bradui che rrome? ¿A so llane tu, rromea, kai sai bradui che rromia?

¹⁷ Sargo te avela, suako lleno morabi te zivil gia sar o Del chinada leke, ta gia sar saia kana o Del ikharda le. Gava si so me phenav kai morabi te cheren sa e khanllira.

¹⁸ O Del te ikharda vareka kai saia sirkunsidime, te na guruvel le, a te ikharela vareka kai inai sirkunsidime, te na sirkunsidilpe.

¹⁹ Soke so mol si te kanda e Devle a na o sam o ni sam sirkunsidime.

²⁰ Suako lleno morabi te achel isto gia sar saia kana o Del ikharda le.

²¹ Te sana ikhardo e Gazdatar kana sana esluga, na brigisao, a te sai cherea te mukliaren tut, mai sukar avela chuke.

²² Soke ko saia esluga kana saia ikhardo, akana si iek manus kai si mukliardo te radil e Gazdake, ta isto gia, ko saia iek manus mukliardo kana saia ikhardo, akana si esluga e Kristoko.

²³ O Del pochinda tumen but kuch, na muken avere llenen te cheren tumen esluge.

²⁴ Goleke phlalalen, suako lleno te achel angla o Del isto gia sar saia kana ikharda le o Gazda.

²⁵ A cheres e diskinie kai inai zinime, inai man ni iek alav e Gazdatar te cheren. A mangav te phenav tumenge so misliu man, te sai pachan ande me alava, soke sem iek manus kai lia e zalba katar o Gazda te sai avel chacho.

²⁶ Me misliu man kai avela mai sukar suako manus te achel gia sar si, cheres o bilacho vreme kai zivi.

²⁷ Te si tut rromi, na mukla, a te inai tut, na rodela.

²⁸ Te zinia tut, ni chere bilachipe, ta e diskinia kai inai zinime ta zinilpe, ni voi ni cherel bilachipe. A gola kai zininpe ka avel len patnia, kai avela mange drago te na nakhen.

²⁹ Phlalalen, so mangav te phenav gale orbenchar si kai achel amen cherricha vreme. Goleke, e zinime morabi te zivin sargo kana inai zinime,

³⁰ a gola kai si zalosne morabi te zivin sargo kana si len bari veselia, a gola kai si len bari veselia morabi te zivin sargo kana si zalosne, a gola kai chinen, morabi te zivin sargo kana inai len niso,

³¹ a gola kai barvaon pe gaia phuv morabi te aven sargo kana ni len niso gale phuviatar, soke gaia phuv kai dikha si te getolpe.

³² Me voliva te na dikhav tumen brigime. Soke e llene kai inai zinime thoven sama pe ezgode e Gazdake ta te sai aven leke drago,

³³ a ko si zinime brigilpe katar e ezgode e phuviake ta te sai perel drago pe rromiake,

³⁴ goleke leko lio si fulado. Isto gia e diskinia kai si phivli ta i e diskinia kai inai zinime, briginpe katar e ezgode e Gazdake ta te sai peren leke drago pe sa ezgode kai cheren ta mislin. A e zinime briginpe katar e ezgode e phuviake ta te sai peren drago pe rromeke.

³⁵ Me dav gala orbe tumare lachimake, ta te sai zivin iek zivoto lacho ta te volin e Gazda mai but neko niso.

³⁶ A ko mislilape kai morabi te zinilpe e diskiniaia kai mangle leke, soke vou si ande burs e zinimake, ta te zinilape ni cherel bilachipe.

³⁷ A te si aver lleno kai mislilpe ande po lio kai le ni trubul le te zinilpe ta te na zinilape mai sukar cherel.

³⁸ Goleke, ko zinilpe cherel sukar a ko ni zinilape ios mai sukar cherel.

³⁹ Iek rromi si phangli pe po rrom so vou avela llundo, a lako rrom te merela, voi sai zinilpe kaia voi mangela, samo kai morabi te zinilpe iekhe llenea kai pachal ando Gazda.

⁴⁰ Me pachau kai voi avela mai veseli te na zinilpe pale. Gava si so me misliu man, ta me pachau kai i man si o Duo e Devleko.