1 Korintios 6 - Biblia ande chib Romani

E joli maskar e phlal

¹ Kana vareko tumendar si ande joli averea, ¿soke llal kai e llene kai ni pachan ando Del te chinen leke kris? Mai sukar si te mangel katar o foro santo te chinen leke kris.

² ¿A so, ni llanen kai o foro santo e Devleko si te chinel e kris sa e suetoke? A tumen, kai si te chinen e kris sa e suetoke ¿Soke nasti lacharen gala ezgode gia minone?

³ ¿A ni llanen kai amen ka china e kris i e suechonenge? ¡Goleke, ios mai sukar ka lachara e ezgode katar gava zivoto!

⁴ Goleke, te avela joli maskar tumende pala e ezgode gale zivotoke, ¿soke thoven llenen kai inai katar e khanlliri te chinen tumenge kris?

⁵ Phenav gala ezgode te sai avel tumenge lallao: ¿A so, maskar tumende inai niko bizai te chinel tumenge kris ta te lacharel gala ezgode maskar e phlal ando pachape?

⁶ ¡A tumen den ande kris iek avere, ta llan kai e llene kai ni pachan ando Del te chinen tumenge kris!

⁷ A tumen sen dosale soke si tumen krisa isto maskar tumende ta gava si iek baro bilachipe. ¿Inai mai sukar te terpin o bilachipe ta te muken te choren tumen?

⁸ ¡A na tumen te cheren o bilachipe ta te choren isto tumare phlalen!

⁹ Na muken te kojavel tumen niko, tumen llanen kai gola kai cheren o bilachipe ni ka avel len than ande charoina e Devleki. Gola kai denpe ando kurvaluko, gola kai blagosin avere delen, ni e murusa kai si sargo diskinie, ni e murusa kai cheren kurvaluko e murusenchar,

¹⁰ ni e chorane, ni e lakomura, ni e matarne, ni gola kai den armaia. Ni iek lendar ni ka den ande charoina e Devleki.

¹¹ Ta nesave tumendar sena sargo gala llene, a akana lien o jaladipe santo ta sen llinde chache ando anav e Gazdako o Jesukristo katar o Duo amare Devleko.

Blagosin ande tumari esnaga e Devle

¹² Nesave llene phenen gia: Me sai cherav so me mangav. Gua si chachipe, a na sa so mangel o manus trubul le. A te cherav so me mangav morabi te na mukau nisavi ezgoda te gazdaril pe ma.

¹³ Ta i phenen gia: O jape si e lleke, ta o lli si e japeke. A o Del ka zatril e dui ezgode. Amari e esnaga inai te thovala po kurvaluko soke amari e esnaga si e Gazdake, a o Gazda si e esnagake.

¹⁴ Ta gia sar o Del vazdia e Gazda katar o meripe, isto gia ka vazdel amen katar o meripe pe zoriaia.

¹⁵ ¿Tumen ni llanen kai suako lleno tumendar si iek kotor katar e khanlliri kai si e esnaga e Kristoki? Goleke, inai sukar iek kotor katar goia esnaga kai si e khanlliri e Kristoki te amilpe iekhe kurvichkaia,

¹⁶ soke te amilpe laia ando kurvaluko, cherdol laia iek esnaga. Soke gia phenel o Pisipe: E dui ka aven sargo iek esnaga.

¹⁷ A ko si istardo po Gazda cherdol iek esnaga lea ando Duo.

¹⁸ Nasen akana katar o kurvaluko, soke varesavo bilachipe kai cherel o manus ni meliarel pi esnaga, a ko cherel o kurvaluko cherel o bilachipe pe esnagake.

¹⁹ ¿A tumen ni llanen kai tumari esnaga si o cher katar o Santo Duo kai o Del dia tumen, ta kai o Santo Duo zivil ande tumende? goleke ni sen gazda pe tumende,

²⁰ soke o Del pochinda tumen. Goleke, morabi te blagosin e Devle tumare esnagaia.