1 Korintios 4 - Biblia ande chib Romani

E buchi katar e apostolura

¹ Tumen morabi te dikhen amen sargo llene kai radi e Kristoke, thode te sikava e volia gurudini e Devleki.

² Goleke, suako lleno kai die lete varesavi buchi morabi te achardol kai si chacho.

³ Mange ni chitilpe te chinena mange kris, tumen o iek kris e manusengi. Soke isto me man ni krisiu.

⁴ Goleke, ni me mislura ni dosaren man katar niso, i te avelape gia me ni phenav galea kai me sem bi dosako soke samo o Gazda sai chinel kris pe ma.

⁵ Goleke tumen na chinen kris gia oma, aduricharen kana ka avel o Kristo, vou ka ikanel ando villelo so akana si ando truniariko, ta ka sikavel so si ando lio. Ondaka o Del ka del suakone llene so perel le.

⁶ Phlalalen, dav tumenge gaia orba pala tumaro lachipe, thovav e Apolo ta isto me man te sikon amendar. Phendem gala alava te sikon amendar te na llan tumare mislura mai angle neko so si ando Pisipe, ta niko te na falilpe ta te na phenel kai iek esluga si mai lacho neko aver.

⁷ Soke inai niso te cherel tumen mai lache averetar. Soke sa so si tumen lienle e Devletar. Ta sa so si tumen si fala leke, ¿A soke falin tumen sargo kana so si tumen cherden le korkorre?

⁸ Akana si tumen sa so mangen, Akana sen barvale, ta zivin sargo charura kai ni trubul tumen niso amendar. ¡Gia sukar avela de istina te aven charura, gia amen sai gazdaria tumenchar ande iek than!

⁹ Soke misliu man kai amen, e apostolura, o Del mukla amen mai palal, sargo e phangle kai chinde lenge te meren. Gia si sar dikhel pe amende o sueto ta i e suechura.

¹⁰ E llene dikhen amen sargo dile cheres o Kristo, a fala e Kristoke, e llene dikhen tumen sargo bizai. Amen sam e kovle, a tumen sen e zurale. E llene den tumen liubao a amenge ni thoven sama.

¹¹ Llik allive nakha bok, trus ta inai amen patave, e llene cheren amen te nakha bari patnia, ta inai amen ni kai te zivi

¹² ta sam chinie kai radi amare vastenchar. Kana den amen armaia, amen blagosi len, kana nakha bari duk, terpila.

¹³ Kana kusen amen, amen da orba lenchar postenimaia. Amen sam lenge sargo o llubri gale suetoko. Ta gia cheren amenchar i ande gala llivesa.

¹⁴ Ni pisiv tumenge gala ezgode te dav tumen ando lallao, phenav len te sai sikon, soke voliv tumen sargo kana sen me chaurre.

¹⁵ Sai avel tumen des milie kovacha te sikaven tumen cheres o Kristo, a dada inai tumen but. Samo iek dad si tumen kai sem me, soke kana phendem tumenge e lachi viasta e Jesukristoki tumen cherdilen me chaurre.

¹⁶ Goleke, moliv man tumenge te sikon mandar.

¹⁷ Goleke bichaldem tumenge e Timoteo, kai voliv le sargo iekhe chaurre, soke vou si chacho e Gazdaia. O Timoteo ka del tumen golli sar zivisardem maskar tumende sargo iek lleno kai pachal ando Jesukristo, kai si so sikavav ande sa e khanllira katar me nakhav.

¹⁸ Nesave llene tumendar acharenpe but tromane soke mislinpe kai me ni ka llau te dikhav tumen,

¹⁹ te mangela o Del, but oma ka llau tumende te dikhav so sai cheren gola kai pe gachin istardon, ta te dikhav dal cheren e orbe kai den.

²⁰ Soke e charoina e Devleki si zor, na samo alava.

²¹ ¿So mangen tumen, te avav tumende iekhe kastea ando va, o te avav volimaia ta postenimaia?