1 Korintios 3 - Biblia ande chib Romani

Esluge e Devleke

¹ Phlalalen, goleke me nasti dava tumenge orba sargo llenenge kai si len o Duo e Devleko, soke tumen zivina sargo e llene bilache kai si pe gava sueto. Goleke diem tumenge orba sargo minonenge ando Kristo.

² Sikadem tumen ezgode minone, diem tumen te pien thud, na jape zuralo soke nasti janale ta ni akana nasti jan jape zuralo,

³ soke llik akana zivin sargo e llene bilache katar gava sueto. Si tumen joli iek pe aver ta jan tumen maskar tumende.

⁴ Soke kana iek lleno maskar tumende phenel: Me sem e Pabloko, aver phenel: Me sem e Apoloko, kote cheren sargo e llene katar gava sueto.

⁵ Goleke, ¿so si o Apolo?, ¿ta so si o Pablo? Von si esluge kai cheres lende tumen avilen kai o pachape. Suako lleno amendar cherda po rado kai o Del phenda te chera:

⁶ Me thodem e simicha a o Apolo thoda o pai, a o Del si kai bariarda e simicha.

⁷ Goleke, ni gua kai thoda e simicha, ni gua kai thovel o pai inai niso, samo o Del si kai cherel te bariol e simicha.

⁸ Goleke, gua kai thovel e simicha ta gua kai thovel o pai sa iek si, soke o Del ka pochinel suakone lleneke prema lengi buchi.

⁹ O Apolo ta me radi e Devleke, a tumen sen e simicha pe phuv ta i o cher kai si e Devleko.

¹⁰ Me sema o kovachi kai vazdel chera ta o Del ande po volipe thoda man te thovav o zido pe phuv, ta aver lleno si kai vazdel upral pe gua zido. A suako lleno morabi te arakhelpe sar vazdel o cher,

¹¹ ta niko nasti thovel aver zido pe gua kai si thodo, soke gua zido si o Jesukristo.

¹² Ta pe gava zido o manus sai vazdel iek cher ta sai thovel sunakai, rup, barra kai si but kuch, o kastenchar, o patrenchar o kastorrenchar.

¹³ A e buchi suakone lleneki ka dikhol bristomaia ando llive e krisako, soke gua llive ka avel iagaia, ta e iag ka zumavel e buchi kai suako lleno cherda.

¹⁴ Te si zuralo so vazdia o manus pe gua zido, ka pochinen leke,

¹⁵ a te phabola so o manus vazdia, ka jasarel pi buchi, i te braduilape sargo kana iek lleno nasel katar e iag.

¹⁶ ¿A so, ni llanen kai sen o cher e Devleko ta kai o Duo e Devleko zivil ande tumende?

¹⁷ Vareko te zatrila o cher e Devleko, o Del ka zatril le, soke o cher e Devleko si santo ta gua cher e Devleko sen isto tumen.

¹⁸ Niko te na kojavel isto vou pe: Vareko tumendar te mislilape kai si bizai prema o bizaipe gale suetoko, te cherdol sargo iek lleno kai ni llanel niso, ta gia ka cherdol de istina iek bizai.

¹⁹ Soke e Devleke si samo dilipe o bizaipe gale suetoko. Soke gia phenel o Pisipe: O Del phandel e bizaien isto ande lengo bizaipe.

²⁰ Ta i phenel: O Del llanel kai e mislura e bizaienge si samo dilipe.

²¹ Goleke, niko te na falilpe pe so cheren e manusa, soke chachimaia sa gala ezgode si tumare:

²² o Pablo, o Apolo, o Pedro, e phuv, o zivoto, o meripe, so si akana ta so si te avelpe. Sa si tumaro,

²³ ta tumen sen e Kristoke, ta o Kristo si e Devleko.