1 Korintios 2 - Biblia ande chib Romani

E orba cheres o Jesukristo krustome

¹ Goleke phlalalen, kana me llelem te phenav tumenge e orba e Devleki kai saia gurudini, ni cherdem le orbenchar kai tumen nasti acharena o te faliu man ande mo bizaipe.

² Goleke me thodem ande mo mislo samo te dav tumenge orba katar o Jesukristo ta katar leko meripe po krusto.

³ Kana sema maskar tumende acharava man kovlo ta izdrava daratar.

⁴ Ni llelem tumende sargo iek lleno kai llanel sa. Me samo diem orba ta muklem o Duo e Devleko te sikavel pi zor,

⁵ ta gia te na avel thodo tumaro pachape po bizaipe e manusengo, te sai avel thodo pe zor e Devleki.

O Del sikavel pi volia

⁶ O chachipe si kai golenchar kai pinllaren mai sukar e orba e Devleki ta kai si bare ando pachape, amen diam orba alavenchar bizaimake. A gala orbe inai katar o bizaipe gale suetoko, ni katar e llene kai gazdarin le soke von ka jasaren pi zor.

⁷ Amen da orba katar o bizaipe gurudino e Devleko, ta katar leki volia kai vou chinada mai anglal te cherel e sueto, te sai avel amenge o baripe kai o Del dia amen.

⁸ Gaia si iek ezgoda kai e llene kai gazdarin e phuv ande gava vreme ni acharde, soke te achardea, nikada ni krustosardea amare Gazda kai si o Gazda e zivotoko.

⁹ Soke gia phenel o Pisipe: O Del chinada golenge kai volin le ezgode kai niko ni dikhla ta ni asunda, ta kai niko ni mislisailo.

¹⁰ Gala si e ezgode kai o Del, katar o Duo cherda te pinllara, soke o Duo pinllarel llik e ezgode mai gurudine e Devleke.

¹¹ Niko nasti llanel so mislil aver lleno. Samo o duo gole lleneko llanel so vou mislil. Isto gia, samo o Duo e Devleko llanel so mislilpe o Del.

¹² A amen ni liam o duo e suetoko, amen liam o Duo kai avel katar o Del, te sai pinllara e ezgode e Devleke kai ande po volipe vou dia amen.

¹³ Amen da gaia orba e alavenchar kai o Duo sikada amen, a na alavenchar kai sikilam amare bizaimaia. Gia sikava e ezgode duoke gia sar sikavel amen o Duo.

¹⁴ Gola kai inai len o Duo e Devleko ni kamen te sikon e ezgode e Duoke, soke lenge si dilipe. Ta von nasti sikon, soke inai len o Duo e Devleko.

¹⁵ A gola kai si len o Duo e Devleko, suako ezgoda acharen ta sikon. A gola kai inai len o Duo e Devleko, nasti dosaren golen kai si len o Duo e Devleko.

¹⁶ Soke gia phenel o Pisipe: ¿Ko pinllarel e mislura e Gazdake? ¿Ko sai sikavel le? a amen si e mislura e Kristoke.