1 Korintios 16 - Biblia ande chib Romani

So si dino

¹ Akana ka dav tumenge orba katar so si dino, te pomozin e llenen kai si katar o foro e Devleko, cheren le gia sar sikadem e khanlliren kai si ande phuv e Galasiaki.

² Suako kurko, suako lleno tumendar morabi te thovel pe iek rig nesave love katar so dobisarda ta te guruvel len, gia ni ka chiden len kana me ka llau te dikhav tumen.

³ Ta kana me ka avav ka bichalav ando Jerusalem e llenen kai tumen ka esvirin, ta ka dav len lila te sai inllaren e love kai tumen chidien.

⁴ A te si te llau i me, von ka llan manchar.

O Pablo ta savo drom ka istarel

⁵ Kana ka llautar morabi te nakhav katar e phuv katar e Masedonia ta ka llau ando Korinto,

⁶ kote sai ka achav tumenchar nesavo vreme, sai avelpe kai ka nakhav o viend. Ondaka tumen ka pomozin man lovenchar te llau ande aver forura.

⁷ Ni kamam te dikhav tumen samo kana ka nakhav tumende, me aduricharav, te mangela o Gazda, te avav tumenchar mai but vreme.

⁸ Me ka achav ando Efeso llik o llive katar o Pentekostes,

⁹ soke putardile mange sa e udara te sai cherav e buchi, i kana si but llene kai si lenge joli pe ma.

¹⁰ Te avilo o Timoteo, cheren te avel leke drago te avel maskar tumende, soke vou radil ande buchi e Gazdaki sargo me

¹¹ goleke na thoven le pe iek rig, mai sukar pomozin le te tradel drom ta te avel esmiro te dikhel man, soke me aduricharav le ogole phlalenchar.

¹² A cheres o phlal o Apolo, me but molisailem leke te llal te dikhel tumen e phlalenchar ta llik akana vou ni kamla, vou ka llal tumende kana sai ka cherel le.

Sikavel len so te cheren

¹³ Achen llungade ta zurale ando pachape ta te aven tromane.

¹⁴ Ta sogo cherena, cheren le volimaia.

¹⁵ Phlalalen, tumen llanen kai e familia katar o Estefanas saia kai mai anglal ande phuv katar e Akaia lie e lachi viasta, ta von thodepe te radin ta te pomozin e phlalen ando pachape.

¹⁶ Me mangav te cheren so von ka phenen tumenge ta te thoven tumen tala e va e llenenge kai radin e Devleke sargo von.

¹⁷ Veseliu man kai avilo o Estefanas, o Fortunato ta o Akaiko, soke kana ni sena tumen

¹⁸ von veselisarde man sargo i tumen. Thoven sama e llenenge kai si sargo von.

Salami

¹⁹ E khanllira ande Asia bichalen tumenge salami. O Akila ta o Priska ta e khanlliri kai chidiniaon ande leko cher, bichalel tumenge but salami ando anav e Gazdako.

²⁰ Len o salami katar sa e phlal, ta den tumen iek chumidipe santo.

²¹ Me, o Pablo, pisiv tumenge gava salami isto me vastea.

²² Vareko te na volila e Gazda o Jesukristo, ¡e armaia e Devleke te peren pe lete! ¡O Gazda o Jesukristo avel!

²³ O Gazda o Jesukristo te thovel pe tumende po volipe.

²⁴ Me voliv sa tumen ando volipe amare Gazdako o Jesukristo.