1 Korintios 14 - Biblia ande chib Romani

¹ Roden te avel tumen volipe, ta mangen katar o Santo Duo te del tumen mai anglal te anen poroka e Devleki.

² Kor del orba ande aver chibia, del orba e Devlea ta na e manusenchar, soke niko ni acharel leke. Ande po duo phenel ezgode gurudine ta niko ni acharel len.

³ A ko anel e poroka e Devleki, bariarel o pachape e llenengo soke acharen leke ta len zor.

⁴ Ko del orba ande aver chibia, cherel le te bariarel piro pachape, a ko anel e poroka e Devleki, bariarel o pachape e khanllirako.

⁵ Me manglema sa tumen te diena orba ande aver chibia, a avilaia mange mai drago te diena orba cheres e poroka e Devleki, soke gaia ezgoda si mai preche neko te den orbe ande aver chibia, te na avela vareko te phenel so phenda o gua lleno kai dia orba ande aver chibia, ta gia e khanlliri te bariol ando pachape.

⁶ Phlalalen, mai preche avela te phenav tumenge so sikavel amen o Del ta te sikiva katar o chachipe, te dav tumenge orba katar e poroka e Devleki ta te dav tumenge orba katar varesavo sikadipe, soke ni blazila tumenge niso te llau te dikhav tumen ta te dav tumenchar orba ande aver chibia.

⁷ E ezgode kai basaldon sargo o firo o e arpa, ni basen sargo iek, soke te avelape gia ni achardola sar asundol suako iek.

⁸ A e tuturuga te na basela bristo kana si o maripe, niko ni lacharelape te marelpe.

⁹ Isto gia si tumenchar, soke kana tumen den orba alavenchar kai nasti achardon ¿sar ka llangliolpe so tumen phenen? ¡Gava si sargo te den orba e balaviake!

¹⁰ Ni llanav pe gachin chibia si pe phuv, ta suako chib si la lake alava.

¹¹ A me te na pinllarava gola alava, me ka avav gole lleneke kai del orba manchar sargo avere phuviengo, ta i vou mange ka avel sargo avere phuviengo.

¹² Goleke, soke tumen pe gachin mangen e bucha e Duoke, roden mai anglal gola bucha kai mai bariaren o pachape e khanllirako.

¹³ Goleke, ko del orba ande aver chibia morabi te mangel e Devletar te phenel so si gola alava kai dia orba te sai acharen le i ogola llene.

¹⁴ Soke me te moliv man ande aver chib, si de istina kai moliv man me duoia, a mo achardipe achel mulo.

¹⁵ Goleke, ¿so morabi te cherav? morabi te moliv man e duoia ta i me achardimaia. Morabi te llilabau e duoia ta i me achardimaia.

¹⁶ Soke tu te blagosi e Devle samo e duoia, ta varesavo lleno te asunela tut, nasti ka molilpe tuia ta te phenel: gia te avelpe, soke ni ka acharel niso.

¹⁷ Tu sar dian fala sai cherdanle but sukar, a gua lleno kai asunda tut, ni ka pomozil le ande niso.

¹⁸ Dau fala e Devle soke dav orba ande aver chibia mai but neko sa tumen,

¹⁹ a kana sem ande khanlliri mange si mai lache te phenav panch alava te acharen len, ta gia te sikavav averen, neko te phenav des milie alava ande aver chibia.

²⁰ Phlalalen, na mislin tumen sargo minone, mai sukar si te aven sargo minone ando bilachipe a bare ande tumaro mislo.

²¹ Ando Pisipe phenel: Ka dav orba gale phuviake ande aver chibia kai ni pinllaren ta katar o mui e llenengo kai si katar aver phuv, ta ni gia ni ka thoven mange sama phenel o Gazda

²² Goleke e chibia si te dikhol iek ezgoda e llenenge kai ni pachan, inai golenge kai si len pachape. A e poroka e Devleki si e llenenge kai si len pachape, na golenge kai ni pachan.

²³ A te avelape kai sa e llene katar e khanlliri chidiniaon ande iek than, ta sa den orba ande chibia, ta del vareko kai ni acharel o inai le pachape, vou ka mislilpe kai tumen dilailen.

²⁴ A saurre te dena orba katar e poroka e Devleki ta del iek lleno kai ni pachal o kai ni acharel, vou ka acharelpe kai si bilacho kana ka asunel gola alava kai si e Devleke.

²⁵ Ta gia ka putaol sa leko lio, ta ka blagosil changenchar e Devle ta ka pachal kai chachimaia o Del si tumenchar.

Morabi te avel liubao ande khanlliri

²⁶ Phlalalen kana tumen ka chidiniaon, nesave sai llilaben, aver sai sikaven o sai phenen so o Del sikada lenge, aver sai den orba ande aver chibia o sai phenen so die orba ande gola chibia. Ta sa gala ezgode morabi te cherdon te bariardol iek avere.

²⁷ Kana ka den orba ande aver chibia morabi te cheren le dui o trin llene, ta te cheren le iek po iek, ta morabi te avel vareko te phenel so phende ande gola chibia kai die orba.

²⁸ A te na avela niko ande khanlliri te phenel so phenen ande gola chibia kai die orba, gola llene morabi te achen ta te den orba samo von peke ta e Devleke.

²⁹ Isto gia te avena poraukura, morabi te den orba dui o trin, a ogola morabi te thoven sama ta te mislinpe so phendilo.

³⁰ A o Del te sikavela vareso iekhe llene kai si besindo kote, ondaka o gua kai dela orba mai anglal morabi te achel.

³¹ Gia iek po iek ka phenen so o Del phenda lenge, te gia saurre ka sikon ta ka barion ando pachape.

³² E poraukura morabi te llanen kana si te phenen e poroka e Devleki ta kana morabi te na den orba,

³³ soke o Del si o Del katar e pas na katar e burkania. Soke gia sar si sikade te cheren ande sa e khanllira,

³⁴ e diskinie morabi te na den orba kana chidiniaon ande khanlliri, soke inai dino lenge te den orba ande khanlliri. Von morabi te aven tala o va pe rromengo, gia sar phenel ando zakono.

³⁵ A te mangena te sikon vareso, te puchen pe rromen ande pe chera, soke inai sukar iek diskinia te del orba ande khanlliri.

³⁶ Tumen ni cherden e alava e Devleke, ta ni sen tumen e edine llene kai lien len.

³⁷ Vareko te mislilape kai si profeta, o pachala kai o Santo Duo cherel buchi lea, ka pinllarel kai e alava kai pisiv tumenge si zakonura e Gazdake.

³⁸ A te na pinllarela e alava kai pisiv tumenge, ni o Gazda ni ka pinllarel le.

³⁹ Goleke phlalalen, morabi te aven zelne te len e poroka e Devleki, ta na achaven e llenen te den orba ande aver chibia,

⁴⁰ ta ande sa gala ezgode te avel liubao ta te cheren le sar trubulpe.