1 Korintios 12 - Biblia ande chib Romani

So si dino e Duotar

¹ Phlalalen mangav te llanen so del o Santo Duo.

² Tumen llanen kai kana ni pachana mukena te chirden tumen sargo korre kai aver dela kai ni den orba.

³ Goleke akana mangav te llanen kai niko kai del orba katar o Duo e Devleko nasti phenel: ¡proketo te avel o Jesus!, ta niko nasti phenel: ¡o Jesus si o Gazda!, te na avela katar o Santo Duo.

⁴ Ande khanlliri o Duo dia suakone llene so te cherel ta sa gola ezgode del le isto gua Duo.

⁵ Si but bucha te radi e Gazdake, ta isto gua Gazda si kai del len.

⁶ Sai cherdon but ezgode, a isto gua Del si kai del e zor suakone llene te cheren len.

⁷ O Del sikavel amen kai kana del amen varesavi zor si te sai pomozi saurren.

⁸ Nesaven o Duo del len te den orba bizaimaia, ta averen, isto o Duo del len te den orba bare llanglimaia.

⁹ Averen del len pachape isto e Duotar, ta aver len e zor te sastaren e nasualen.

¹⁰ Nesave len e zor te cheren bare ezgode Devlikane, aver te phenen so si te avelpe, ta averen del len o Duo te llanen save si e duura kojamne ta o Duo chachuno, ta averen del len te den orba ande chibia, ta i averen te sikaven so phende ande chibia kai die orba ogola llene.

¹¹ Ta sa gala ezgode cherel le o Santo Duo pe zoriaia, ta vou si kai del suakone llene sar vou mangela te del len.

¹² E esnaga e manuseki i te si la but kotora, iek esnaga si. Isto gia si o Kristo.

¹³ Soke katar iek Duo sama saurre kristime ande iek esnaga, i te avena judiura o griegura, o te avena o te na avena esluge, ta saurren dia isto gua Santo Duo.

¹⁴ E esnaga inai cherdi katar iek kotor, katar but kotora si cherdi.

¹⁵ Te phenela o porrno: Soke me ni sem va, me ni sem katar e esnaga, pala gua so phenel o porrno ¿ka mukel te avel katar e esnaga?

¹⁶ A o kan te phenela: Soke ni sem kan, me ni sem katar e esnaga, ¿pala gua ka mukel te avel katar e esnaga?

¹⁷ Sa e esnaga te avilaia iak, nasti asundama. A sa e esnaga te avilaia kan, nasti khandiama.

¹⁸ Goleke o Del thoda suako kotor katar e esnaga po than kai vou mangla.

¹⁹ Te avilaia sa e esnaga iek kotor ni avilaia iek esnaga.

²⁰ Akana si but kotora e esnaga, a e esnaga si samo iek.

²¹ E iak nasti phenel e vasteke: man ni trubul man tutar, ni o soro nasti phenel e porrnenge: Man ni trubul man tumendar.

²² Goleke, e kotora e esnagake kai dikhon kai inai len zor, gola si kai mai trubun.

²³ Ta e kotora e esnagake kai amenge ni mol len but si kai mai furiava len. Ta isto gua chera ogole kotorenchar katar e esnaga kai ni kama te sikava,

²⁴ a e kotora e esnagake kai sikava ni arakha len but, gua si soke o Del cherda gia e esnaga te arakha mai but e kotora e esnagake kai amenge ni mol len but.

²⁵ Ta gia e kotora e esnagake te achen ande iek than ta te briginpe iek averetar.

²⁶ Kana iek kotor katar e esnaga dukhadol, sa ogola dukhadon. A kana iekhe kotore katar e esnaga den le pachiu, sa ogola veselinpe lea.

²⁷ Goleke, tumen sen e esnaga e Kristoki, ta suako lleno tumendar si iek kotor kai si le iek buchi te cherel.

²⁸ O Del mukla ande khanlliri ando purvo than te aven e apostolura, a po duito than e poraukura, a po trito than e kovacha, ta ma palal averen kai cheren bare ezgode Devlikane, ta llene kai sastaren e nasualen, ta nesave kai pomozin, aver te aven birovi, ta i aver kai den orba ande aver chibia.

²⁹ Nasti aven sa apostolura, poraukura o kovacha. Ta nasti cheren saurre bare ezgode Devlikane,

³⁰ ta inai saurren e zor te sastaren e nasualen. Ta ni den orba saurre ande chibia, ta ni llanen saurre te sikaven so phenen gola chibia kai den orba ogola llene.

³¹ Tumen morabi te mangen, e mai lache ezgode kai del o Duo. A me sikavav tumenge iek drom kai si ios mai lacho.