1 Korintios 11 - Biblia ande chib Romani

¹ Goleke sikon mandar sar me sikivav katar o Kristo.

O dikhlo e diskiniengo

² Gia sukar cheren kana suako drom den tumen golli mandar ta kanden so sikadem tumen.

³ Goleke mangav te llanen kai o Kristo si o soro suakone muruseko, ta kai o rrom si o soro pe rromiako, gia sar o Del si o soro e Kristoko.

⁴ Iek murus te ucharela po soro kana molilpe o kana phenela so si te avelpe mai angle, mukel po soro ando lallao.

⁵ A iek diskinia te na ucharela po soro kana molilape o kana phenela so si te avelpe, mukel po soro ando lallao. Gua si sargo te chinel sa pe bal.

⁶ Goleke iek diskinia te na ucharela po soro, mai sukar avela te chinel pe bal, a te avela lake lallao te chinel pe bal, mai sukar te ucharel po soro.

⁷ O murus morabi te na ucharel po soro, soke vou si cherdo prema o Del ta dikhol pe lete o baripe e Devleko. A pe diskinia dikhol o baripe e muruseko,

⁸ o murus inai ikando katar e diskinia, soke e diskinia si ikandi katar o murus.

⁹ Ta o murus ni cherdilo cheres e diskinia, e diskinia si kai cherdili cheres o murus.

¹⁰ Goleke e diskinia morabi te ucharel po soro te sikavel po liubao karing po rrom, ta i po liubao karing e suechura.

¹¹ A ando Gazda, ni o murus nasti zivil bi e diskiniako, ni e diskinia nasti zivil bi e muruseko.

¹² Si istina kai e diskinia si cherdi katar o murus, ta i kai o murus biandol katar e diskinia, ta sa e ezgode si cherde katar o Del.

¹³ Isto tumen chinen e kris dal si sukar e diskinia te na ucharel po soro kana molilpe.

¹⁴ Gia sar sam sikade te chera, si iek lallao iekhe muruseke te mukel pe bal te barion,

¹⁵ A e diskiniake inai lallao te mukel pe bal te barion. Soke lake si dine gola bal te ucharel po soro.

¹⁶ Goleke, vareko te inai leke drago te cherdolpe gia ta mangel te denpe gala orbe, morabi te llanel kai ni amen ta ni e khanllira e Devleke ni pinllara aver ezgoda neko gaia kai sam sikade te chera.

Murin e sinia e Gazdaki

¹⁷ Ande alava kai pisiv tumenge akana nasti phenav kai cheren sukar, soke me acharav kai kana tumen chidiniaon gua ni pomozil tumen, soke kana tumen chidiniaon saurre achen dukhade.

¹⁸ Mai anglal phende mange kai kana tumen chidiniaon si joli maskar tumende, ta me pachau kai gua si de istina.

¹⁹ ¡Gala ezgode morabi te avenpe te sai dikhol ko llal chachimaia pala o Kristo!

²⁰ Kana tumen chidiniaon te jan prema so cheren, goia inai de istina e sinia e Gazdaki.

²¹ Soke kana avel o vreme te jan, suako lleno sigarel te jal piro jape ta ni aduricharel ogolen. Ta gia nesave achen bokhale, ta aver pien ta maton.

²² ¿So, inai tumen chera kai te jan ta te pien? ¿Tumen ni traden liubao pe khanlliri e Devleki ta thoven ando lallao e llenen kai inai len niso? ¿So ka phenav tumenge? ¿Kai cheren sukar? ¡Pe gala ezgode iok!

E sinia e Gazdaki

²³ So o Gazda o Jesukristo sikada man, si isto gua so me sikaden tumen: Kai e riat kana die e Gazda o Jesukristo te mundaren le po krusto, lia ande pe va o marrno,

²⁴ ta kana dia fala e Devle, phaglale ta phenda: Gava si mi esnaga kai si phagi, cheren gava te sai den tumen golli mandar.

²⁵ Ta kana jale, isto gia lia o taso, ta phenda: Gaia mol kai si ande gava taso si mo rat kai lea o Del achel pe iek nevi orba tumenchar. Suako drom kai ka pien katar gava taso den tumen golli mandar.

²⁶ Ta suako drom kana jana katar gava marrno, ta piena katar gava taso, o meripe e Gazdako phenen lligo ni ka avel vou.

Sar morabi te ja pe sinia e Gazdaki

²⁷ Goleke, vareko te jala katar o marrno ta te piela katar o taso e Gazdako ta ni thovel sama pe so cherel, ka avel dosalo katar e esnaga ta katar o rat e Gazdako.

²⁸ Goleke, morabi te zumavel suako lleno isto vou pe mai anglal te jal katar o marrno ta te piel katar o taso.

²⁹ Soke te jala ta piela ta te na thovela sama kai gua si e esnaga e Gazdaki, vou peke jal ta piel iek kris.

³⁰ Goleke, but llene tumendar si nasuale ta inai len zor, ta i nesave mule.

³¹ Goleke, te zumavaia amen isto amen, ni avela soke o Gazda te chinel kris pe amende.

³² Goleke o Gazda del amen ande kris te sai sikiva ta te na ava jasarde e llenenchar kai ni pachan.

³³ Goleke phlalalen, kana ka chidiniaon te jan aduricharen iek avere.

³⁴ Te si vareko bokhalo, mai sukar te jal ande po cher, gia o Del ni ka dukhavel tumen pala e ezgode kai cheren kana chidiniaon. Ogola ezgode ka lacharav len kana ka llau te dikhav tumen.