1 Korintios 1 - Biblia ande chib Romani

Salami

¹ Me o Pablo, ikhardo pala e volia e Devleki te avav apostol e Jesukristoko, ta o phlal o Sostenes.

² Bichala salami tumenge kai sen katar e khanlliri e Devleki kai si ando Korinto, kai ando Kristo Jesus, tumen sen esvirime pe iek rig ta ikharde te aven katar leko foro santo, ta gia ka aven ande iek than sa e llenenchar kai blagosin e Jesukristo amaro Gazda, ta i Gazda katar o foro santo.

³ O Del kai si amaro Dad, ta amaro Gazda o Jesukristo te del tumen volipe ta e pas.

E fala katar sa so dia o Del

⁴ Suako drom dav fala e Devle pala tumende, pala o volipe kai dia tumen ando Kristo Jesus.

⁵ Soke cheres lete o Del dia tumen sa o barvalipe Duoko alavengo ta bizaimako,

⁶ soke e orba e Jesukristoki achili zurali maskar tumende.

⁷ Goleke, so tumen aduricharen e Kristo te avel, ni ka trubul tumen ni iek blagosipe e Devletar.

⁸ Gia ni ka jasaren tumaro pachape ando Jesus, ta kana ka avel amaro Gazda o Jesukristo, niko ni ka dosarel tumen katar nisavo bilachipe.

⁹ Chacho si o Del kai ikharda tumen te aven ande iek than leke Chavea e Jesukristoia amaro Gazda.

Zivisara ande iek mislo

¹⁰ Phlalorralen, ando anav amare Gazdako o Jesukristo, moliv man tumenge te aven ande iek mislo ta te na avel chingar maskar tumende. Zivin ando volipe, ta te avel tumen iek mislo ta iek lio.

¹¹ Phenav gava, phlalorralen, soke llanglem katar e familia e Kloeki kai si chingara maskar tumende.

¹² Mangav phenav, kai nesave llene maskar tumende phenen gia: Me sem e Pabloko, aver phenen: Amen sam e Apoloke, a aver phenen: Amen sam e Sefaseke, ta aver phenen: Amen sam e Kristoke.

¹³ ¿Sai avelpe kai o Kristo si fulado? ¿So, e Pablo krustosarde pala tumende? ¿O tumen kristisarde ando anav e Pabloko?

¹⁴ ¡Fala e Devleke kai me ni kristisardem nika tumendar, samo e Krispo ta e Gaio!

¹⁵ Goleke, niko nasti phenel kai kristisailo ande mo anav.

¹⁶ Ta i kristisardem e familia e Estefanaski, ta ni dav man golli o kristisardem avere,

¹⁷ soke o Kristo ni bichalda man te kristiv, vou bichalda man te phenav e lachi viasta, ta ni cherdemle te faliu me man ande mo bizaipe, te na chikniarav o meripe e Kristoko po krusto.

O bizaipe e Devleko ta o bizaipe e manuseko

¹⁸ E orba katar o meripe e Jesukristoko po krusto si iek dilipe golenge kai ka jasaon, a golenge kai braduinpe, gava si amenge, gaia orba si zor e Devleki.

¹⁹ Sar phenel o Pisipe: Ka cherav e bizaien te jasaren po bizaipe ta te jasaol o bizaipe katar e bizai.

²⁰ ¡O Del sikada kai e llene katar gaia phuv si dile, soke mislinpe kai llanen sa. A o chachipe si kai von ni llanen niso!

²¹ O Del si gia bizai kai ni mukla e llenen katar gava sueto te pinllaren le pe bizaimaia. Goleke, vou mangla te braduil golen kai pachan ande orbe kai amen sikava, i te asundona gala orbe sargo iek dilipe.

²² E judiura mangen te dikhen bare ezgode Devlikane te sai pachan amari orba kai phena lenge, a e griegura roden o bizaipe ande orbe,

²³ goleke amen phendam lenge e orba kai o Jesus si o Mesias ta kai mulo po krusto. A bute judionenge gala orbe si sargo kana kusen len, a golenge kai inai judiura, gaia orba si iek dilipe.

²⁴ A golenge kai o Del ikharda, te avena o te na avena judiura, e zor ta o bizaipe e Devleko sikadilo ando meripe katar o Mesias kai o Del bichalda.

²⁵ Goleke, so dikhol sargo iek dilipe e Devleko, si but mai baro bizaipe neko nisavo bizaipe e manusengo, sai mislinpe kai o Del inai le zor, a o chachipe si kai vou si mai zuralo neko nisavi zor e manusengi.

²⁶ Len sama phlalalen kai maskar tumende, kai sen ikharde e Devletar, inai ni iek llanglo prema o bizaipe e manusengo, ta inai maskar tumende niko te avel le iek rado baro maskar e llene o te aven katar iek familia barvali.

²⁷ I te mislinape e llene gale phuviake kai tumen sen dile ta kai ni sen niso, o Del esvirisarda tumen, te sai gola kai mislinpe kai si bizai, te acharen kai ni llanen niso.

²⁸ O Del esvirisarda e llenen kai angla e akha e manusenge inai len zor, inai len pachiu, kai niko ni thovel lenge sama, te sai gola kai mislinpe kai von si but bare angla o sueto te acharen kai chachimaia von inai so mislin.

²⁹ Goleke angla o Del niko nasti falilpe.

³⁰ O Del thoda tumen ande iek than e Jesusea, ta fala kai sen ande iek than lea akana sen bizai, ta i thoda tumen te aven katar o foro santo e Devleko, ta lien o zivoto ostade.

³¹ Ta isto gia, sar phenel o Pisipe: Ko mangela te falilpe ande vareso, te falilpe ando Jesukristo, o Gazda.