1 Juan 5 - Biblia ande chib Romani

O pachape kai dobil e sueto

¹ Suako lleno kai pachal kai o Jesus si o Kristo, si biando e Devletar. A suako lleno kai volil e dade, volil i leke chaven.

² Kana amen voli e Devle ta chera leki buchi, llana kai amen voli i e Devleke chave.

³ Soke gava si te voli e Devle, te kanda leke alava, ta inai trudno te chera le.

⁴ O chachipe si kai sogo si biando e Devletar, dobil e sueto. Ta amaro pachape cherda te dobi gale sueto.

⁵ Gua kai pachal kai o Jesus si e Devleko Chavo, dobil e sueto.

⁶ Kana o Jesukristo avilo pe gava sueto, avilo katar o pai ta o rat; na samo katar o pai, vou avilo katar o pai ta i o rat. O Duo phenel gava, ta sogo phenel o Duo si chachipe.

⁷ Soke trin phenen kai gua si chachipe:

⁸ O Duo, o pai ta o rat. Gala trin phenen isto gua.

⁹ Amen pacha ande so phenen e llene, a so phenel o Del si mai baro soke o Del phenel katar leko Chavo.

¹⁰ Gua kai pachal ande Devleko Chavo inllarel o chachipe ande po lio; a o gua kai ni pachal, cherel e Devle sargo kojamno, soke ni pachal ande so phenel o Del katar leko Chavo.

¹¹ A gava si so phenel o Del amenge: Kai dia amen o zivoto ostade, ta gava zivoto si ande leko Chavo.

¹² Gole kai si le o Chavo e Devleko, si le o zivoto ostade. A gole kai inai le o Chavo e Devleko, inai le o zivoto ostade.

¹³ Me pisiv tumenge kai pachan ande Devleko Chavo te llanen kai si tumen o zivoto ostade.

¹⁴ Si amen vera ando Del, soke llana kai te manga fiso kai si prema leki volia, vou asunel amen.

¹⁵ Ta isto gia sar amen llana kai vou asunel amaro molipe, i amen llana kai si amen so manglam letar.

¹⁶ Fiko te dikhela kai leko phlal cherel iek bilachipe kai ni inllarel po meripe, morabi te molilpe, ta o Del ka del le zivoto. Soke sai te avel iek bilachipe kai ni inllarel po meripe. Nesave bilachipe cheren e manuse te jasaol o zivoto ostade, a me ni phenav kai pala gua bilachipe morabi te molilpe.

¹⁷ Suako ezgoda kai inai lachi si bilachipe, ta na suako bilachipe inllarel po meripe.

¹⁸ Amen llana kai suako lleno kai biandilo e Devletar, ni thovelpe te cherel o bilachipe, soke o Jesukristo, o Chavo e Devleko arakhel le ta o llavolo nasti dodisarel le.

¹⁹ Amen llana kai sam e Devletar ta sa o sueto si gazdarime e llavolotar.

²⁰ I amen llana kai o Chavo e Devleko avilo ta cherda te pinllara e Devle o chachuno; ta amen sam e Chavea o Jesukristo. Gava si o Del o chachuno ta o zivoto ostade.

²¹ Chavalen, arakhen tumen katar e dela kojamne. Gia te avelpe.