1 Juan 4 - Biblia ande chib Romani

O chachuno pachape

¹ Phlalalen, na pachan tumen ande suako duo, goleke tumen morabi te dikhen dal gala duura si e Devleke o iok; soke but poraukura kojamne likiste ando sueto.

² Gia sai ka llanen ko de istina si le e Devleko Duo: Suako duo kai phenel kai o Jesukristo avilo sargo manus, gua si e Devleko,

³ o duo kai phenel kai o Jesus ni avilo sargo manus, inai e Devleko, gua si o duo katar o Antikristo kai tumen asunden kai si te avel, a vou akana si ando sueto.

⁴ Chavalen, tumen sen e Devleke ta dobisarden gole profetanen kojamne, soke o gua kai si ande tumende si mai baro neko o llavolo.

⁵ Von si e suetoke, goleke den orba e suetotar ta o sueto asunel len.

⁶ A amen sam e Devleke. Gua kai pinllarel e Devle asunel amen, gua kai inai e Devleko ni asunel amen. Goleke cheres gala ezgode amen sai pinllara ko si le o Duo chachuno o ko si le o Duo kojamno.

O volipe phenel kai o Del si amenchar

⁷ Phlalalen, si te voli amen soke o volipe avel e Devletar. Suako lleno kai volil si chavo e Devleko ta pinllarel e Devle.

⁸ A gua kai ni volil ni pinllarel e Devle soke o Del si volipe.

⁹ O Del sikada amenge po volipe kana bichalda pe Chave o edino, te sai amen zivi cheres lete.

¹⁰ Leko volipe si inai kai amen volisardam e Devle. O volipe si kai vou volisarda amen ta bichalda pe Chave ta cheres lete amaro bilachipe achel prostime.

¹¹ Phlalalen, te volisarda amen gia o Del, amen morabi te voli amen maskar amende.

¹² Nikada niko ni dikhla e Devle, a te voli amen maskar amende o Del si amenchar ta leko volipe ka achel amenchar.

¹³ Amen llana kai sam e Devlea ta kai vou si amenchar, soke dia amen po Duo.

¹⁴ Isto amen dikhlam kai o Dad bichalda pe Chave te braduil e sueto.

¹⁵ Suako lleno kai phenel kai o Jesus si e Devleko Chavo, o Del achel lea a vou e Devlea.

¹⁶ Goleke amen llana ta i pacha kai o Del volil amen. O Del si volipe, ta suako lleno kai volil pe phlalen si e Devlea a o Del lea.

¹⁷ Gia cherdol chachipe o volipe maskar amende, ta gia kana ka avel o llive e krisako, te avel amen vera, soke amen zivi sar zivisarda o Jesukristo pe gava sueto.

¹⁸ Ando volipe inai dar, o volipe chacho tradel avri e dar. A te daral fiko kai o Del ka del le patnia, gua si kai ni sikilo te volil de istina.

¹⁹ Amen voli soke vou volisarda amen mai anglal.

²⁰ Suako lleno kai phenel: Me voliv e Devle ta murzil pe po phlal, vou si kojamno. Soke te na volila pe phlale kai dikhel le, sar ka volil e Devle kai nasti dikhel le.

²¹ O Jesukristo dia amen gala alava: ko volil e Devle morabi te volil i pe phlale.