1 Juan 1 - Biblia ande chib Romani

O alav katar o zivoto

¹ So saia mai anglal, so asundam, so dikhle amare akha ta so dodisarde amare va katar o Alav zivotoko.

² Soke o zivoto avilo te sai dikhol, ta amen dikhlam le, ta phena tumenge gava zivoto ostade kai saia e Dadea, ta i kai avilo amenge te dikha le.

³ Goleke amen phena tumenge so amen dikhlam ta so amen asundam, te aven i tumen amenchar, sargo amen sam e Devlea o Dad ta leko Chavo, o Jesukristo.

⁴ Gala ezgode amen pisi len te avel amari veselia pherdi.

O Del si villelo

⁵ Gaia si e viasta kai o Jesukristo sikada amen, ta kai amen phena tumenge: O Del si villelo ta ande lete inai truniariko.

⁶ A te phena kai amen sam lea, a sam ando truniariko, gua si kojaipe soke ni chera o chachipe.

⁷ A te lla amen ando villelo, sargo o Del kai si ando villelo, ondaka maskar amende si volipe, ta o rat e Jesuseko leko Chavo, chistosarel amen katar sa o bilachipe kai amen chera.

⁸ A te phena kai amen nikada ni chera o bilachipe, isto amen kojava ta o chachipe inai amenchar.

⁹ Te phena e bilache ezgode kai amen chera, vou si lacho te chistosarel amen katar amaro bilachipe.

¹⁰ A te phena kai amen nikada ni cherdam bilachipe, amen chera te achel o Del sargo kojamno, ta leke alava inai amenchar.