Ruti 2 - Seqa Full Bible

Ruti Sa Tepere Boazi

¹ Sa ku kike torae Elimeleki like te Naomi, oye sa kike boysi noyi sua, sa tae me te pupu te Elimeleki, ritongoa ne Boazi.

² No Ruti, qule ni Moabi sa voy goyti te kue Naomi, Vamoyo aqo ro me la te oyra barue bali no me la joke oyra busoa bali ka ku sua te barue te kue ka oye sa kamonae te kue ro. Naomi sa voy te kue oye, Sanoi, zo la, re toqu.

³ Si oye sa kesini no sa zo la te barue bali no sa toto joke oyra busoa bali ka ku sua te lua te rokusua doyra oyra boysi papala. Oye sa la jaju ba kama utini vo, barue ta ona barue moyna Boazi, boysi sa tae me te pupu te Elimeleki.

⁴ Kama moninio to oye, Boazi sa me doka Betilema no, savoy goyti oye te kue oyra, Iaova me ku una ram! No oyra ka vatavele la, Iaova me manani amo re! kavoy.

⁵ Boazi sa tanani boysi sa kinikini oyra ona boysi jaju, Ada ona qule varoqa te ta, ne? savoy.

⁶ Boysi sa kinikini jaju sa vatavele la, Ta ne qule ni Moabi sa vele koype me Naomi te vodu ni Moabi.

⁷ Oye sa voy, Vamoyo aqo ro me joke no quqene oyra poykae busoa bali ka ku sua te lua, te rokusua doyra oyra boysi papala. Oye sa zo la te barue bali no sa jaju moyna me pasi saruku ne doka sinani, oye aba to sa la zengo neto ngoyni soi te mamarom, savoy.

⁸ Si Boazi savoy goyti te kue Ruti, Toqu, mo vanata aqo ro. Moyna ko zo la no jojoka te ka barue veke no moyna ko zo kesini ngoyni goti. Mo ku koype to oyra qo nabulu qule ro goyti.

⁹ Mo mia vale baruea bali ka papalae oyra like, no mo koype toyro to ngoyni ka jajua oyra qule. Aro ko soynani moyna oyra like kasi doyra tebe amo re. No sada ko kangoso, zo la no mo la pale bi te koybo ka vapoda sia moyna oyra like, savoy.

¹⁰ Te sada goyti, oye sa kuputu julo la tarakenakae te lua. Savoy goyti oye te kue Boazi, Ke, re ko vatere tu kamonae no ko mia utini aqo ro, ba aro ko kike boysi gagalea!

¹¹ Boazi sa vatavele la, Aro ka soynani moyna aqo taba oyra pisipita re ko joyjini te kue ravam pasi te sada sa li mo boysi - Aro ko utini ngoyni savoy re ko kesini tamam no sinam no mo kumala vatasuku no ko me ku koype oyra boysi kama utini moynamo.

¹² Iaova me ngota velini oyra jaju re ko joyjini. Re mo pale poraea noyin sua te kui Iaova, Bangara ni Izireli, te kue oye to re ko me ku kakaoloa te sarazuloa ona aramitae oye, savoy.

¹³ Savoy goyti Ruti te kue oye, Aro ko mia utini re ko vatere tu kamonae te kue aqo ro, qo bue. Bati aro kama soyva qo oyra mo nabulu qule re, ba mo ngeoro mumutongo no ngeoro emoso te re sa kutopoka aqo ro, savoy.

¹⁴ Te sada oyra ka la aki, Boazi sa soynani oye, Me goyti. Mo pale kavia bereti no mo tobo la te luka vaini. Sa voy ta oye si, Ruti sa tongunu una oyra boysi jaju, no Boazi sa kea la oye kavia poytu bali ka qoqa te nako. Oye sa aki, sa koma no kavia pitaniaki sa ku sua.

¹⁵ Sada Ruti sa surutapadire, sa zo la me la jojoka napu vele savoy, Boazi sa voyvoytuni oyra ona likelike jaju, Sada oye sa jojoka te ngoyni kam vabekeleni oyra ukea bali ne, moyna kam va mamaqatae oye.

¹⁶ No goyti vele, ram mam roye vajele kavia busoa bali koyna Ruti te oyra kam uke sia moyna no mina toyro koyna oye me joke, no moyna kam monani oye.

¹⁷ Savoy ta oye si, Ruti sa jojoka te barue ta sa doka te viluvilu. No oye sa borete bito soypa oyra bali sinani oye sa quqene, no noyqatae poytu bali oye sa pale sa vatanga gae mano keri kilogaram.

¹⁸ Oye sa kutopoka no sa iro vasipele la te kumala, no ravae sa mia tabae bali oye sa joke. Oye si Ruti sa pale vajele no sa koyna Naomi pitaniaki sa ku sua kama oyke bitovo.

¹⁹ Ravae - Naomi sa tanani oye, Be ngoyni ko la jojokae re te tava ini ne? Be barue ko jajua re, ne? Mana me ku te kue boysi sa mia utini amo re! No Ruti sa soynani ravae te ngoyni sa la jajua. Ritongoa boysi ko la jajua ro te tava ini ne Boazi, sa voy.

²⁰ Naomi sa soynani ravae qule, Iaova me manani oye! Iaova kama nudovo vatakabolae ona kamonae te kue oyra boysi ka tu no oyra ka li soy. Naomi sa soma vele, no sa voy, Boysi goyti sa vatenge itu, oye me du boysi aramitaki.

²¹ No Ruti, qule ni Moabi sa voy, Oye sa soynani vele aqo ro, Re mo ku koype to oyra qo boysi jaju ro me doka te sada oyra ka bito palea oyra qo poytua bali.

²² Sa voy goyti Naomi te kue Ruti - ravae, Ini me noyi sua te kue amo re, toqu, te mo zo koype oyra ona nabulu qule, bati barue te boysi veke ne ini mara varoka amo ini.

²³ Si Ruti sa jaju una to oyra nabulu qule te Boazi ka jojoka, sa doka te sada ka pale bito sadae bali. No oye sa vakakue to ravae.