Leviticus 9 - Seqa Full Bible

Oyra Boysi Sisiama Ka Toto Doyra Jaju

¹ Te vaviua tava Mosese sa keleke Eroni no oyra toytulieke no oyra boysi kinakinaka.

² Oye savoy te kue Eroni, pale kieke bulumakao lieke varoqa me mina vavakatu zaqala no kieke sipi lieke me mina vavakatu katunuro, keri pita pupura goyti kasi doyru makomako no mo vavakatua la te vakomamanae Iaova.

³ Savoy ta oye mo soynani oyra boysi ni Izireli: Moyra pale kieke qoti lieke ona vavakatu zaqala, kieke bulumakao varoqa no kieke lami, keri pita pupura goyti me kieke avea doyru no kasi doyru makomako, ona vavakatu katunuro,

⁴ no kieke bulumakao no kieke sipi lieke ona vavakatu arakitaki mara vavakatua la te vakomamanae Iaova sa seva to vavakatu vere mara aralomirini oela. Bati Iaova me takabula te kue ram te tava ini.

⁵ Oyra ka iro oyra pita Mosese sa voytuni oyra te tarakenakae toypaka variere, no araququnia doyra oyra boysi ni Izireli ka me vatanga no ka diere te vakomamanae Iaova.

⁶ Savoy ta oye Mosese savoy te kue oyra, goyti pita sa voytuni Iaova ram mina joyjuni, soy aravamekea Iaova me takabula te kue ram.

⁷ Mosese savoy te kue Eroni, zo me te sara barasi no mo vavakatua mo vavakatu zaqala no vavakatu katunuro soy me sivere mo zaqala tamo no oyra boysi ni Isireli; mo vavakatua la keke te oyra boysi no mo siere ni oyra, sa seva Iaova sa voytuni.

⁸ Si Eroni sa zola te sara barasi no sa voyevale toytu lieke bulumakao sa seva kieke vavakatu zaqala te tani.

⁹ Oyra toytulieke oye ka iro la madakae pita pupura te kue oye, no oye sa vapujere la koyrisi te madaka no sa toyro la te vati kekeoa sara barasi taboyna; sikia madaka oye sa jilingini te kotae sara barasi taboyna.

¹⁰ Oye sa noyko te sara barasi taboyna voa, keri koromemi no tomanasuae kola te vavakatu zaqala, sa seva Iaova sa voytuni Mosese;

¹¹ zio no koypa oye sa noyko te paqarania ngoyni ka toypakae.

¹² Savoy ta oye, oye sa voyevale vavakatu katunuro. Oyra toytulieke ka koyna la oye madaka no oye sa repe ni madaka te vati nevae sara barasi taboyna.

¹³ Oyra ka koyna la oye oyra soisoia vavakatu katunuro, sa seva to boytu no oye sa noyko te sara barasi taboyna.

¹⁴ Oye sa qolo oyra koba no keri nikini no sa noyko toringini vavakatu katunuro te sara barasi taboyna.

¹⁵ Bito ta Eroni sa iro la keke te oyra boysi ni Izireli. Oye sa pale qoti ona vavakatu zaqala te oyra boysi ni Izireli no sa voyevale no sa vavakatu ni kieke vavakatu zaqala sa seva oye sa joyjuni te vavakatu kinaka.

¹⁶ Oye sa iro la vavakatu katunuro no sa vavakatua te vato sa voytuni Iaova.

¹⁷ Oye sa iro vele la vavakatu vere, sa pale kieke puda koyrisi palava no sa noyko te sara barasi sa seva oye sa joyjuni te vavakatu katunuro te saruku.

¹⁸ Oye sa voyevale bulumakao no sipi lieke sa seva vavakatu arakitaki te oyra boysi ni Izireli. Oyra toytulieke ka koyna la oye madaka, no oye sa repe ni vati nevae sara barasi taboyna.

¹⁹ Ba tupurua voae bulumakao no sipi, voa te peputu, voa te mamanae, keri koromemi no tomanasuae kola-

²⁰ oyra pita goyti ka vabekele poka te mamanae doyru oyru keri pita pupura goyti, no Eroni sa noyko voa te sara barasi taboyna.

²¹ Eroni sa kajara poka ni mamanae keri pita pupura no doyli dekanae doyru te vakomamanae Iaova sa seva kieke vavakatu kajara puka sa seva Mosese sa voytuni.

²² Eroni sa pale poka koyrisi te kue oyra boysi no sa manani oyra. No sa vavakatua vavakatu zaqala, vavakatu katunuro no vavakatu arakitaki, no oye sa kobi juolo.

²³ Mosese no Eroni kuru puka la te toypaka variere. Sada oyru kuru juolo me, oyru kuru manani oyra boysi; no aravamekea Iaova sa takabula te kue oyra boysi taba.

²⁴ Nako sa tae me te ngoyni sa kue Iaova no sa sebe vavakatu katunuro no tupurua voa te sara barasi taboyna. No sada oyra boysi taba ka mia pita goyti, oyra ka ukulu te kima no ka kapata juolo no ka vazaka Iaova.