Leviticus 3 - Seqa Full Bible

Vavakatu Arakitaki

¹ Sada ka oye sa kea me ona vavakatu arakitaki, no sa kea kieke bulumakao lieke ba quole, oye me kea me te kue Iaova pitapupura kama makomako vo.

² Oye me vakapete koyrisi te boytu ona pitapupura no me voyevale te ngoyni ka puka tae te toypaka variere. No oyra toytulieke Eroni ka boysi sisiama mara repe leqitini madaka te sara barasi taboyna.

³ Te vavakatu arakitaki oye me kea la vavakatu ka joyjuni te nako te kue Iaova: taba voa ka sapene koba no ka sumoto te koba,

⁴ keri koromemi no voae doyru, no tomanasuae kola, oye me palekesini toringini keri koromemi.

⁵ Sinani oyra toytulieke Eroni mara noyko te sara barasi keri koromemi no voae doyru ka noyko toringini vavakatu katunuro te nako katu, sa seva keke ka joyjuni te nako, kakaurua sa vakima Iaova.

⁶ Sada oye sa kea kieke toytu sipi sa seva kieke vavakatu arakitaki te kue Iaova, oye me kea kieke pitapupura quole ba lieke kama makomako vo.

⁷ Sada oye sa kea kieke sipi, oye me kea la te vakomamanae Iaova.

⁸ Oye me vakapete la koyrisi te boytu ona pitapupura no me voyevale te tarakenakae toypaka variere. No oyra toytulieke Eroni ka boysi sisiama mara repe leqitini madaka te sara barasi taboyna.

⁹ Te vavakatu arakitaki oye me iro me vavakatu ka joyjuni te nako te kue Iaova. Voae, totongonia voa te peputu ka pote kudeke vatanga te poyda luboro, taba voa ka sapene koba ba ka sumoto te koba,

¹⁰ keri koromemi no voae doyru, no tomanasuae kola, oye me palekesini toringini keri koromemi.

¹¹ Boysi sisiama me noyko te sara barasi keri koromemi no voae doyru sa seva pitanaki, vavakatu ka joyjuni te nako te kue Iaova.

¹² Sada ona keke oye kieke qoti, oye me kea la te vakomamanae Iaova.

¹³ Oye me vakapete la koyrisi te boytu pitapupura no me voyevale te tarakenakae toypaka variere. No oyra toytulieke Eroni ka boysi sisiama mara repe leqitini madaka te sara barasi taboyna.

¹⁴ Te oyra pita oye sa kea oye me joyjuni keke goyti te kue Iaova te nako: taba voa sa sapene koba ba sa sumoto te koba,

¹⁵ keri koromemi no voae doyru vatanga te keri ziopota, no tomanasuae kola, oye me palekesini toringini keri koromemi.

¹⁶ Boysi sisiama me noyko te sara barasi taboyna sa seva pitanaki, vavakatu ka joyjuni te nako, sa kakauru. Tabae voa ona Iaova.

¹⁷ Tamana goyti me kuo sua taba sadasada te oyra sapoko aba kala kuo me, be ka ngoyni kam kue: ram kasi mina oyke ka voa ba madaka.