Jona 4 - Seqa Full Bible

Moma Te Jona Te Noyni Marovele Te Buoe

¹ Jona sa mia pitagoyti sa roka varoka, no oye sa moma.

² No oye sa vivisi la te kue Buoe, oye savoy, Vanata, Buoe! Kama oye goyti vo pita aro ko soyna, sada aro aba ko kuo te kumala? Savoy ta te soy oye, aro ko soyko paki la Tasisi ne. Bate aro ko utini re ko Bangara kamonae no noyni marovele, ko koyki te moma no ko pudae noyni, re ko Bangara mao soka mo nanana sa taka mo vadoka taka.

³ Sinani, Buoe, palekesini qo tu, sa noyi koyini to aro me lei te me tu ne.

⁴ Ba Buoe sa ngeoro vele la, Sa tuotuongono te mo moma re ne ba?

⁵ Jona sa zo kesini kumala lata no sa tongunu te neva sa tae me ngada. Te ngoyni ta oye sa joyjuni ona toypaka, sa tongunu te mamarom no sa perini me mia ada pita me doka te kumala lata.

⁶ Sinani, Buoe Bangara, sa vene keike pita titiba qaqara me puoto koye Jona no me va mamarom boytu oye, soy me saete oye te voyra roka oye sa tepere, no Jona sa kemani varoka pita titiba noyene.

⁷ Ba te saruku lolongoro te tava belanae, Bangara sa vene keike duoduole same qurete pita titiba goyti soy me nala.

⁸ Sada ngada sa puka me, Bangara sa peqani me keike vovosele voyla sa tae me te neva sa pukae me ngada, no voylae ngada sa doyke boytu Jona, sa vatanga tapodoko. Oye sa soyko to me lei, no savoy goyti, Sa noyi koyini to aro me lei te me tu ne.

⁹ Ba Bangara savoy te kue Jona, Be savoy sa tuotuongono te mo moma re te pita titiba ne ba? O, savoy. Qo moma ro sa tuotuongono me doka te lei.

¹⁰ Ba Buoe savoy, Re ko vamajele pita titiba goyti, re kama joyjuni mo no kama vapuoto mo pita titiba goyti. Oye sa puoto me keike kose, no sa nuoro napu to kose belanae.

¹¹ Ba kama gae vo aro me noyne vamajele kumala lata ni Ninive sa kue taba pitapupura no sa koye 120,000 boysi, kama majala doyra soyna pita sa kuo te koyrisi dekanae doyra te koyrisi moyria doyra ne?