Jona 2 - Seqa Full Bible

Vivisi Te Jona

¹ Te luoboro korua koete, Jona sa vivisi la te kue Buoe ona Bangara.

² Oye savoy, Te luoboro qo kuo totoqu aro ko vakangiere Buoe, no oye sa tuqini aqo. Te lavorae vodu vongene, aro ko pine arasasaoto, no re ko vanata qo qila.

³ Re ko sia la aqo ro te kokodurua luka, Te luoboroa la kuolo, no zazaka sa kuloni aqo, taba oyra mo bugusu no posaka ka sapene aqo.

⁴ Aro ko voy ne, re ko sure sia aqo te tarakenakam; oye ba, aro me mi vele napu la te Jelepade taboyna te re.

⁵ Luka kokodoru sa sapene aqo, sa doka te kokunuqu, kuolo lata sa kulo aqo ro, kokoli ni masi sa bute aqo sa doka te boytoyqu.

⁶ Aro ko doduru juolo la te kotae doyra oyra supu, vodu ni te lua sa kupene aqo ro taba sada. Ba re ko pale vavelini me qo tu te quara, kei Buoe qo Bangara.

⁷ Sada qo tu sa vatanga takesi la, aro ko noynetoyro amo re, Buoe, no qo vivisi sa latu te kue re, te mo Jelepade taboyna.

⁸ Oyra boysi ka kakasi taru te kue oyra vuvuju uloulomo, ka lure sia doyra aravamangana.

⁹ Ba aro, te luoboro voangae kola, me vavakatu te kue amo re. Pita aro ko puini moyna amo re me vavoto. Aravakavele sa tae me te kue Buoe.

¹⁰ No Buoe sa soynani koete, no koete sa dolani Jona te tapalanaburu.