Zakari 14 - Bible azumeina

Dur ma dabid’a ki mbad’a hi Ma didinid’a

¹ Gola! Burâ hi Ma didinina nga mi mba. A mba b’rau ahle suma agi hurumuzina kä iragi na.

² Ma didina mba mi tok andjaf suma á dur Jerusalem. A mba hlazì ma ngolâ, a mba hurum azina, a mba b’lak aropma, abo azì ma ngolâ suma kuruma a mba yozi magomba. Wani suma a arâ a mba dap pei kur azì ma ngolâ d’i.

³ Ma didina mba mi nde woi á dur kandjaf sum ndazina d’igi mam nga mi dur adjeu dei kur bur ma ayîna na.

⁴ Kur bur máma mba mi tin asem yam ahina d’a Olif fa ngagad’a yam Jerusalem abo ma yorogonid’a. Ahina d’a Olif ndata mba d’i wak kä aduk mbà. Abot ma hina mba mi dadak kazigam abo ma norâ, ma hina mba mi dadak kazigam abo ma sutna mi. Hor ra ngola mba d’i ar adigaziya, mba d’i i irat abo ma yorogona kabo ma fladegena mi.

⁵ Ata yi máma agi mba ringîgi kur hor ra aduk ahuniyô manid’a, kayam hor ndata mba d’i i gak Asal. Agi mba ringîgi d’igi abuyogi ngolo a ring abo giget ta andagad’a ti giget kur atchogoid’a hi Oziyas amul ma Juda-nid’a na. Ata yi máma Ma didina Alo mana mba mi mba ki mam suma mi tinizi irazi vazina.

⁶ Kur bur máma yina mba mi b’o d’i, ab’lenga mba d’i le ki glasâ d’uo mi.

⁷ Bur máma ni bur ma mba mi ka’î iram vam zenena, Ma didina mi wumî mam hol, faleid’a nga d’uo mi na, andjeged’a nga d’uo mi, wani b’od’a mba d’i ndeï woi ni fladege.

⁸ Kur bur máma mbiyo ma he arid’ina mba mi djangî woi kur Jerusalem. Abom ma hina mba mi i iram kur apo d’a Matna abo ma yorogona, abom ma hina mba mi i iram kur alum ma ngol ma Mediterane-na abo ma fladegena mi, a mba le hina andol kawaliya.

⁹ Ma didina mba mi ka’î amul ma yam andagad’a petna. Kur bur máma mba mi ar Ma didina ni mam tu go, simiyêm mba mi arî mam tu go mi.

¹⁰ Ambasa ki zla tat pet mba d’i mbut ni d’igi fula na, tcholï Giba dei gak mba Rimon abo ma sutna hi Jerusalem-ma. Jerusalem mba d’i arî ata yat akulo kal yima nguyutna pet. Ti mba d’i tinï ad’ud’a avun agre’â hi Benjamin-na dei gak mba avun agrek Ma adjeuna, gak mba ata yima vun agre’â mi kong kuana, tinï ad’ud’a ata gong nga fiyak ka ndjola hi Hananel-la dei gak mba ata yima a miret guguzlud’a hamulîd’a kuana.

¹¹ Suma a mba kak kuru, a mba b’lagat bugol luo d’a, mba d’i kak ki halasa.

¹² Wana ni tugud’ei d’a Ma didina mba mi tum kandjaf suma pet suma a mba mba ki azigar mazina á dur Jerusalem-mba: Nge nge pî hliwim mba mi ndjulup pei akulo kasemu, iram mba d’i ndjulup kur aziyad’u, sinam mba d’i ndjulup avunam mi.

¹³ Kur bur máma Ma didina mba mi tinizi tcha d’a tatad’a ngola adigaziya, nge nge pî mba mi ve ndrama abomu, nge nge pî mba mi zi abom akulo yam ndrama mi.

¹⁴ Suma Juda-na a mba dur yam Jerusalem, a mba tok ndjondjoîd’a handjaf suma a nguyutna pet, nala, lora ki kawei ma hapma ki baruna ablaud’a mi.

¹⁵ Tugud’ei d’a tum suma ndata mba d’i tum akulumeina, koro ma akulumei akulumeina, djambala, korona kahle suma abageina pet.

¹⁶ Ata yi máma suma ar aduk andjaf suma pet suma a mba á dur suma Jerusalem-mina, a mba mba bizad’a ki bizad’a á grif kä avok amul Ma didin ma ad’engêm kal petna, á le vun til ma Zlub’ud’a mi.

¹⁷ Le andjaf ma nga yam andagad’a ka hina mi i nga Jerusalem á kud’or amul Ma didin ma ad’engêm kal petna d’uo ni, alona mba mi se yam ambas mamba d’i.

¹⁸ Le suma Ezipte-na a i nga Jerusalem á le vun til ma Zlub’ud’a d’uo ni, a mba tumuzi ki tugud’eid’a d’igi a tum kandjaf suma ding suma a i nga á lü vun til máma d’uo na na mi.

¹⁹ Ni hina ba, a mba ngop ki suma Ezipte-na kandjaf suma ding suma a i nga á lü vun til máma d’uo na.

²⁰ Kur bur máma a mba b’ir ata aglenga hakulumeinina ala Bei tchod’a ni d’a hi Ma didinid’a. Duguyo suma kur gong nga kud’ora hi Ma didinid’a a mba mbut ni d’igi angulei suma a nga avok yima ngal ahle suma ngat buzunina na.

²¹ Duguyo suma Jerusalem-ma pet ki duguyo suma Juda-na a mba tinizi irazi vazi mi Ma didin ma ad’engêm kal petna. Suma a mba mba á hahle suma ngat buzunina a mba yi ki hliuna. Kur bur máma a mba fe sama mbut abom kur gong nga kud’ora hi Ma didin ma ad’engêm kal petna d’uo d’a.