Vama ndum mbeina 15 - Bible azumeina

Malaikana azi ki tugud’ei d’a tcho d’a dananda

¹ An we vama simat ma ding ma ngol ma atchapma sä akulo. Malaikana kid’iziya a nga ki tugud’ei d’a tchod’a kid’iziya aboziya. Ni tugud’ei d’a tcho d’a danan nda dap vun ayîna hAlonid’a.

² An we vana d’igi alum ma ngol ma ngal tchitchilingâ na, gizeîd’a kakud’a. An we suma a kus ayîna yam ambur máma, yam vama a yorom d’igi mam na na yam nomrod’a hi simiyêmbina mi. Azi nga tchola avun alum ma ngol ma ngal tchitchiling máma. Ading ma Alona mi hazizina mi nga abozi mi.

³ Azi nga hle sawala hi Moise azongâ hAlonid’a ki sawala hi Gor timinid’a ala: Salad’a Alo ma ad’engêm kal petna, sun manga ni sun nda ngol la kal papad’a. Amulâ handjaf sumina, nga hur mangâ ni d’ingêr gagazi.

⁴ Salamina, ni nge ba, mba mi lang mandarang nguo ge? Ni nge ba, mba mi suburung nguo ge? Kayam ang tu ni Ma bei tchod’a ba na. Andjaf suma pet a mba mba, a mba grif kä avorong á kud’urongû, kayam sun mang nga d’ingêra, ti nde wa woi abua.

⁵ Bugol ahle ndazina, an we vun gong nga kud’ora hAlona d’a akulod’a ti mal leyo, zlub’u d’a glangâsa hAlonid’a ti nga kua.

⁶ Malaika suma kid’iziya suma a nga ki tugud’ei d’a tcho d’a kid’iziyad’a abozina, a buzuk kei kur gong nga kud’ora hAlonid’a ki baru d’a hap pa ngal wiwilika ataziya, d’ik ma lora mi nga djinda kuruzi mi.

⁷ Ma dingâ tu aduk ahle suma ari suma fid’ina, mi he malaika suma kid’iziya ndazina kop ma kid’iziya ma lor ma nga oîd’a kayîna hAlo ma ari ma gak didinina.

⁸ Andosâ nga oîd’a kur gong nga kud’ora hAlonid’a ki subura kad’enga hAlonid’a. Sana mi ndak á kal kur gong ndata d’i, gak tugud’ei d’a tcho d’a kid’iziya d’a malaikana vat abozid’a ti dap tua.