Sawal la kal teglesa 7 - Bible azumeina

¹ Aropma ki yuguneina a dala: Ndak hulongîya, ndak hulongîya, ndak ka Sulam-mba, ndak hulongîya, ndak hulongîya, ar ami gologu! Ni kayam me ba, agi gologi d’a Sulam-mba d’igi suma a gol ades lü ma mbàna na ge?

(Mamu)

² Mi dala: Ndak amulâ goromba, asek mi djif kur atuguruna, ir tchuguluk ka nguid’a woi d’uhla ni d’igi hed’eu ma sama d’alâ mi yoroma na.

³ Uvu’î d’igi kop ma vunam dalalâ ma a vo süm guguzlu d’a his djivid’a heîd’a kurum teteuna na. Haya’î d’igi geme ma mol ma tamasa ti nguyuma na.

⁴ Apok dja’î d’igi gro duguyo suma a tchuguzi ngoneîd’ina na.

⁵ Dele’î d’igi gong nga ndjol la fiyak ka a yat ala sï ahlo’â d’a na. Ira’î d’igi apo d’a Hesbon nda go ki vun agrek ma Bat-Rabim-ma na mi. Atchina’î d’igi gong nga ndjol la fiyak ka Liban nda salat ma ndjola nga mi gol sä woi abo ma Damas-sid’a na mi.

⁶ Ya’î tinda akulo d’igi ahina d’a Karmel-la na. Tumus sa kaka ni d’igi baru d’a hleud’a na, amulâ mi hak sä tam akulo ata ngangam ma ndak b’alam kuana.

⁷ Man nda o d’a tan lan zlezleû kaka, ndak ki djif heî, suma a le kak heî mi.

⁸ Fiyak maka ni d’igi amilaûd’a na, apo’î d’igi ades vud’ut na mi.

⁹ An dala: An mba ni djak akulo ata amilaûd’a, an mba ni vat vud’ut kä! Ar apok mi ngros sei d’igi ades vud’a guguzlud’a na, ar muzuk ka avunaka ti his afufuîd’a d’igi vud’agu poma na!

¹⁰ Vuna’î d’igi süm guguzlu d’a djivid’a na...! Ti dala: Nga mi sulul kä woi yam ma an le kam heîna, nga mi kal kä woi kikling avun suma a bur senina mi.

(Ndad’u)

¹¹ An ni hi ma an le kam heîna, ni mam ba, hurum vanu.

Sawal la karagayad’a ( 7.12—8.5a ) Djivi d’a le kad’a (Ndad’u)

¹² Ma an le kam heîna, ang mbeya, ei i abageya, ei i buri sä kur azì ma kelâ.

¹³ Ei mba i avin yorogo tcholol ata yima guguzlud’a á goleizi na ni ti gat wa ko zu? D’oze b’o mata buzuk wa woi zu? D’oze agu grenatna mi b’o wa zu? Ata yi máma an mba ni tagang o manda.

¹⁴ Vud’agu mandragorâ nga mi b’ik hisâ kä b’ib’ik. Ami nga ki vud’agu ma djivi ma lara avun agrek mamina, ma awilina ki ma adjeuna. An ngomozi ni yam ang ma an le kang heîna.