Sawal la kal teglesa 6 - Bible azumeina

¹ Yuguneina a djobot ala: Ta djif heîd’a, ma ndak le kam heîna, mi i ni lara ge? Ma ndak huruk vum heîna, mi i nabo ma lara ba, ei i haleizi d’ang nge?

(Ndad’u)

² Ti dala: Ma an le kam heîna, mi i kur asinem ma a pe agu ma his ma afufuîna kua tetengâ á pol tumiyô mama hur asinena, á dut tamasa mi.

³ Ma an le kam heîna ni mana, an ni mamba mi, mi nga mi pol tumiyô mama aduk tamasa.

Sawal la vahla ( 6.4—7.11 ) Zla d’a yam mba an le kat heîd’a (Mamu)

⁴ Mi dala: Ndak ka an hurun vak heîd’a, ndak djivî d’igi azì ma ngol ma Tirsa-na na, ndak djivî d’igi Jerusalem na mi, wani nda’î vama mandarâ d’igi azigarâ a nga tok ad’u drapo mazid’a na mi.

⁵ Ndak mbuttcha irak keyo, kayam nga d’i djiwin akulo. Tumus sa kaka ti ni d’igi ades b’ogei suma a nga i sulugota kä á i yam ahina d’a Galät-tina na.

⁶ Siyak mi hapa ni d’igi ades tumiyô suma a buzugï woi aduk mbina ata yima mbusina na. A nga tit ki b’oziyozina kakap ma ar kalena nga d’i.

⁷ Agozlok mi djifâ krovo kur baru mak ka zlupa kaka d’igi abo vud’agu grenatna na.

⁸ Aropma hamulîna a ni dok karagaya, arop suma gureina hamulîna a ni dok klavandi, yuguneina hamulîna a ndak nga á ndumba d’uo mi.

⁹ Wani gugu manda, ti ni vat tu. Ndjondjoî manda, ti nabo asut vat tu, ni d’a ta vud’uta ti le kat heîd’a. Yuguneina a golod’u, a nga dala: Ar va mi lak ki! Aropma hamulîna kamiyôm suma gureina a nga gilet mi, a nga dala:

¹⁰ Ni nge ndata ba, ti ndei d’igi yima fod’a na, ti djifâ d’igi tilâ na, ti wile d’igi afata na, ti ni vama mandarâ d’igi azigar suma a nga tok ad’u drapo mazid’ina na ge?

¹¹ An nga ni i kur asine ma a pe agu nowana kuana á gol agu ma deî awili kur horina, á we na ni guguzlud’a nga d’i gat tchu? D’oze agu grenatna nga mi b’o zu?

¹² An we d’uo, wani djib’er manda ni d’igi an nga ni kur pus ma dur ayîna na.