Sawal la giled’a 99 - Bible azumeina

Alona namulâ, ni ma bei tchod’a mi

¹ Ma didina nga mi tamula, ar suma a zlaga! Mi nga kaka aduk tcherebêna, ar andagad’a ti giged’a!

² Ma didina ni ma ngolâ kur Siyon; mam mi ma kal akulo yam andjaf suma petna.

³ Ar azi gileng simiyêng ma ngol ma suma le mandarâ aboma. Gagazi, angî ma bei tchod’a ba na.

⁴ Ar azi gileng ang amul ma min d’ingêrina. Ni ang ba, tin d’ingêra ki sariya d’a ka d’a irata aduk andjafa hi Jakob-ma mi.

⁵ Agi hagi ngola mi Ma didina Alo meina, agi grivigi kä avok yi mam ma tin asema. Mam mi ma bei tchod’a ba na!

⁶ Moise azi ki Aron a nga aduk mam suma ngat buzuna, Samuel mi nga aduk suma a yum simiyêma mi. A yi Ma didina, mi humuzi mi.

⁷ Mam nga mi dazi zlad’a kur d’ugul la tchola gongzonga. Azi nga ngom vun mam ma hed’a ki gat mam mba mi hazizid’a mi.

⁸ Ma didina Alo mamina, ni ang ba, hulongôzï humba, ang tagazi ala angî Alo ma vat hurung ngei yam tcho mazid’ina, ni ang ba, ngobozi yam sun mazi d’a led’a.

⁹ Agi hagi ngola mi Ma didina Alo meina, agi grivigi kä yam ahina mam mba a tinit irat vata, kayam Ma didina Alona ni ma bei tchod’a ba na!