Sawal la giled’a 97 - Bible azumeina

Ma didina nga mi tamula; ar suma ayâ

¹ Ma didina nga mi tamula! Ar suma yam andagad’ina pet a ayâ, ar suma yam til la tetengina a le furîd’a mi.

² Nduvunda ki d’ugula a nguyumu, d’ingêra ki sariya d’a ka d’a d’ingêra nad’u ged’a hi leu mam mba ted’id’a.

³ Akud’a nga d’i ngal avoromu, nga d’i ngal suma djangû suma a nguyuma.

⁴ Wile mamba ti b’o yam duniyad’a, andagad’a ti wad’u, ti nga d’i zlaga.

⁵ Ahuniyôna a nga lau woi d’igi dubangâ na avok Ma didina, avok Salad’a ma te yam andagad’a petna.

⁶ Akulod’a nga d’i de woi yam d’ingêr mamba, suma yam andagad’ina pet a nga we subur mamba mi.

⁷ Suma a nga kud’or fileinina ki suma a subur tazi kama pet a mba mbut zulona, alona pet mi grif kä avok Ma didina mi.

⁸ Ma didina, suma Siyon-na a huma, a le furîd’a, suma kur azì ma nglo ma Juda-na pet a nga aî yam sariya mang nga kad’a mi!

⁹ Kayam ang Ma didina, angî ma sä akulo ma kal tegles ma yam andagad’a petna, ang kal alona pet akulo mi.

¹⁰ Agi suma lagi yam Ma didinina, agi noyôgi tchod’a woyo! Mam nga mi ngom arid’a hi mam suma d’engzengîd’a, nga mi prud’uzi woi abo suma asa’atna mi.

¹¹ B’od’a nga d’i b’o yam suma d’ingêrâ; suma huruzi d’ingêra a nga le furîd’a mi.

¹² Agi suma d’ingêrâ, agi lagi furîd’a yam Ma didina, agi suburum simiyêm ma bei tchod’a ba na mi.