Sawal la giled’a 95 - Bible azumeina

Giget ta yam kud’orid’a

¹ Agi mbeyegï ei gileigi Ma didina ki delei akulo, ei suburi ahina mei d’a suta ki furîd’a!

² Ei igi avorom á suburumu, ei gileizi ki furîd’a ki sawal la tetenga.

³ Kayam Ma didina nAlo ma ngolâ, mam mamul ma ngol ma yam alona petna.

⁴ Mam mi ma zul la yiyika handagad’id’a nga aboma; ahuniyôna yazi d’a keked’iwurenga ni mamba mi.

⁵ Alum ma ngolâ ni mama, mam lumî mamu; andagad’a, mam lat kabom ni mam mi.

⁶ Agi mbeyegïya, agi grivigi kä, ei kud’oreigi Ma didin ma leina.

⁷ Kayam mam mi Alo meina, ei ni suma mi poleina, ei nades tumiyô mam suma mi ngomeina. Ini agi humugi zla d’a mi data. Mi dala:

⁸ Ar agi b’alagi hurugi d’igi abuyogi ngolo a b’al huruzi kur Meriba na d’i, ar agi b’alagi hurugi d’igi azi b’al huruzi kur bur ma azi nga abagei hur ful ma Masa-na na d’uo mi.

⁹ Abuyogi ngolo a we sun nda an lata hina pî, a kugunu, a ngan mi.

¹⁰ Bizad’a dok fid’i, an gol suma kur atchogoi ndatina d’igi vama ndjendjed’a na, an dala: Sum ndazina ni suma yazi vit teina, azi we nga lovot manda d’uo mi.

¹¹ Ni na ba, kur hur man ma zala an gun tan ala: Azi mba kal kur ambas sa an nga hazizi á tuk tazi kuad’a d’i.