Sawal la giled’a 92 - Bible azumeina

Ar ei gilei Ma didina

¹ Ni sawal la gile d’a kur bur ma sabatnid’a.

² Ni vama djivina á suburung ang Ma didina, á gileng simiyêng ang Alo ma sä akulo ma kal teglesâ!

³ Ni vama djivina á de zla o mang nga didinda woi ki yorogo tcholola, á de zla d’engzeng manga woi kur andjeged’a

⁴ kading ma ziyom dogona, kading ma teteng ma a hle ki sawalina mi.

⁵ Ma didina, an nga ni le furîd’a yam sun mang nga ang lata! An nga ni de woi yam sun nda ang lat kabonga mi.

⁶ Ma didina, sun mang nga ang lata ni d’a kal teglesa, djib’er manga ni d’a ndak á sana mi wat ad’ut tuo d’a!

⁷ Sama bei ned’a mi ndak á wat ad’ut ti, sama lilid’a mi ndak á humut tuo mi.

⁸ Le suma asa’atna a nga d’uf d’igi asuna na, le suma bei d’ingêra a nga b’o ni, a le hina pet ná ba woi ki irazi fafat.

⁹ Wani Ma didina, ang nga kaka akulo gak didin.

¹⁰ Ma didina, gola! Mang suma djangûna pet a mba ba woyo, suma bei d’ingêra a mba b’rau woi yayak mi.

¹¹ Ang mbud’un ad’enga d’igi avüna na, ang von mbul ma furîd’a kanu.

¹² Iran ndi mal lei yam suma a nga kud’uguna, human nga d’i hum zlad’a hi suma a tok tazi kan á tchana mi.

¹³ Suma d’ingêrâ a mba wulî d’igi amilaûna na, a wulî d’igi agu sedre ma Liban-na na mi.

¹⁴ Azi ni d’igi agu ma nga ped’a kur gonga hi Ma didina Alo meinid’a na, a nga d’uf kur gulumun mama mi.

¹⁵ Kur mamarazi pî a nga vut kua, ambirizi nga, humazi nga d’i got mi.

¹⁶ Kayam ndata, a nga tak kei ala Ma didina ni ma d’ingêrâ; mam mi ahina manda, ni ma bei mbut ira atam ba na.