Sawal la giled’a 8 - Bible azumeina

Subura hAlonid’a ki ngola hi sanid’a

¹ Ni sawal la David mi hlat kadingâ hi Gat-na mi hat mi ma ngolâ hi suma hle sawalina.

² Ma didina, Salad’a, simiyêng ni ma kal tegles yam andagad’a petna. Ang nga tak ngol mang nga kal teglesa woi kur akulod’a.

³ Ang mba nde ki giled’a avun gugureina ki kem mba tchapona á d’el mang suma djangûna ki suma a hal hlatchugulina bei de zlad’a mi.

⁴ Ata yima an gol akulod’ina, nala, sun nda ang lat kabonga, ata yima an gol tilâ ki tchitchiud’a suma ang tinizi sä akulonina,

⁵ an nga ni djop tan ala: Sana ni nge ba, ang djib’er kam ge? Gor sana ni nge ba, ang ngomom ge?

⁶ Ang im subur mamba akulo go d’igi d’a hi ang Alonid’a na, ang kulubum avaval la amula kamu, ang hum ngola mi.

⁷ Ang tinim á te yam ahle suma ang lazi kabongâ pet, ang hum ahlena pet abomu,

⁸ nala, tumiyôna, b’ogeina, amuzleina, azureina kamburei suma abageina,

⁹ aluweina, kulufâ kahlena pet suma a nga kur alum ma ngolîna mi.

¹⁰ Ma didina, Salad’a, simiyêng ni ma kal tegles yam andagad’a petna.