Sawal la giled’a 64 - Bible azumeina

Alona mi kus yam suma a de zla d’a tchod’ina

¹ Ni sawal la gile d’a David mi hlat mi hat mi ma ngolâ hi suma hle sawalina.

² Alo mana, an nga ni tchi kangû, ang humunu, ang ngomon abo suma djangû suma an nga ni lazi mandarazina.

³ Ang prud’un ndei abo zla d’a ndjak vuna hi suma asa’atnid’a, abo suma a ndjak vunazi kana ki suma batrangâ mi.

⁴ A nga gur sinazi d’igi suma a gur mbigeud’a na, zla mazi d’a ded’a ni d’igi yeû d’a zala na.

⁵ Azi ngei tazi kä gumun á yet suma d’engzengâ, azi nga yed’ezi bei mandarâ kuruzi ba.

⁶ Azi nga he tazi ad’enga kur zla mazi d’a tcho ndata, azi nga gun dauna kä gumunu, azi nga dala: Sa mba mi wumî nge ge?

⁷ Azi ndjak vunazi á le tchod’a, a nga dala: Zla meid’a ndjak wa da’. Djib’er ra kur sana krovod’a, sa nga mi wat ad’ut ti.

⁸ Wani Alona nga mi yed’ezi ki yeû mamba, nga mi yed’ezi ki mbuleina bei azi we ba.

⁹ Gola! Zla mazid’a ti hulong wa kaziya! Suma pet suma a wazina a nga kidjik yazi ad’uziya.

¹⁰ Suma pet a nga le mandarâ, a mba de woi yam sunda hAlonid’a, a mba wäd’u sun nda mam lata mi.

¹¹ Suma d’ingêrâ a le furîd’a yam Ma didina, a ngei tazi natam mi. Suma pet suma bei tchod’a kuruzina, a mba subur tazi kam mi.