Sawal la giled’a 63 - Bible azumeina

Ang hat hurung yam Alona

¹ Ni sawal la gile d’a David mi hlat kid’a mi ring ngei tam abo Saul hur ful ma Juda-nid’a.

² Alona, angî Alo mana, an nga ni halangû, zlang nga d’i lanu, an nga ni hat hurun kang d’igi andaga d’a so d’a mbiyona nga mi ndagat tuo d’a na.

³ Kayam ndata, an nga ni golong kur gong mang nga kud’ora á wad’eng manga ki subur manga.

⁴ Kayam o mang nga didinda kal kak kä karid’id’a, an mba ni suburungû.

⁵ Ata yima an nga kaka ki iran yam andagad’a tua na, an mba ni suburungû, an mba ni yo abon akulo ki simiyêngû.

⁶ An mba ni hop pei kahle suma djivina d’igi te ma djivi ma mbulâ na, an mba ni le furîd’a, an mba ni gileng mi.

⁷ Ata yima an nga ni bur kä na, an nga ni djib’er kangû, gak yima fod’a an nga ni dugot djib’era kangû.

⁸ Kayam angî ma ndjununa, an nga ni le furîd’a ata yi ma an nga ngeid’a ad’u gigingângâ.

⁹ An reî tan ni ki angû, ad’eng manga nga d’i djigin akulo.

¹⁰ Wani suma a halan á tchid’ina, a mba i kä azulei ata yima kä ad’u andagad’ina.

¹¹ A mba tchazi ki mbigeu d’a fiyaka, a mba mbut ni vama ved’a hi ngûnina.

¹² An amulâ mba ni le furîd’a kang ang Alona; sama lara ma gun tam ki simiyêngâ mba mi subur tam kang mi, kayam suma ka zlad’a a mba duguzi vunaziya.