Sawal la giled’a 57 - Bible azumeina

Tchen nda yam ndjundid’a

¹ Ni sawal la gile d’a David mi hlat mi hat mi ma ngolâ hi suma hle sawalina. Mi hlat ni kid’a mi ngei tam kur zul ahinad’a abo Saul-la.

² Ang wan hohowonu, Alo mana, ang wan hohowonu, kayam an hal yima ngeid’a natang d’igi ahleka grotna a ngei tazi ad’u giging asuzi na, gak djop vuna mi kal leyo.

³ An nga ni yang ang Alo ma sä akulo ma kal teglesâ, ang Alo ma nga lahlena pet kana.

⁴ Ei ata yi mang ma akulona, ang sud’unu. Ar sama nga mi digin ad’una mi mbut zulona, ang tagan o mang nga didinda ki gagazi manga mi. Tchol ndjö

⁵ An nga aduk suma tcho suma d’igi azlona na na, azi ni d’igi amburei suma a mut sumina na; siyazi mi ni feta d’igi asapa ki yeûd’a na; sinazi d’i te ni d’igi mbigeu d’a fiyaka na.

⁶ Alo mana, ang tak ngol mang nga kal papad’a woi kur akulod’a, ar subur manga ti b’o woi yam andagad’a pet mi.

⁷ Azi gun dauna kä avoronu, tan tchuk susub’ok. Azi djugot zula kä avoronu, wani azi tazid’a a tchuk kua. Tchol ndjö

⁸ Iran ndi d’igil wa, Alo mana, iran ndi d’igil wa, an mba ni hle sawala, an mba ni gileng mi.

⁹ An mba ni zlit akulo, an mba ni hlading mana ki taulâ manda á gilengû, an mba ni zlit pipira akulo.

¹⁰ Salad’a, an mba ni suburung aduk suma, an mba ni hle sawala á gileng aduk andjaf suma mi,

¹¹ kayam o mang nga didinda ti kal gak ti i akulo hur alona, gagazi manga ti kal gak ti i do d’ugula mi.

¹² Alo mana, ang tak ngol mang nga kal papad’a woi kur akulod’a, ar subur manga ti b’o woi yam andagad’a pet mi.