Sawal la giled’a 48 - Bible azumeina

Siyon nazina hAlonina

¹ Ni sawal la Kore groma a hlata.

² Ma didina ni ma ngol ma mi ndak á giled’a kur azì mam ma ngol ma yam ahina mam mba a tinit irat vatina.

³ Nahina d’a djif fa suma yam andagad’ina pet a nga le furîd’a kata. Siyon nahina d’a nga abo ma norîd’a, nazì ma ngolâ hamul ma ngolîna.

⁴ Alona mi nga kaka kur azì máma, mam mi ad’enga hazì mámid’a.

⁵ Amuleina a tok taziya, a nga i ad’u tazi á dur azì ma Siyon-na.

⁶ Ata yima azi goloma, azi le atchap, a le mandarâ, a ringâ.

⁷ Ata yi máma a nga zlaga, a zlak d’igi atchad’a nga d’i zlak abo vuta na,

⁸ d’igi bato d’a nglo d’a Tarsis-sa nga d’i kus sei abo babar ma ngol ma abo ma yorogonina na mi.

⁹ Ahle suma ei humizina, ei weizi ki irei kur azina hi Ma didin ma ad’engêm kal petna, kur azina hAlo meinina. Alona mba mi ngom azì máma burâ ki burâ. Tchol ndjö

¹⁰ Alo mamina, ami nga djib’eremi yam o manga kur gong mang nga kud’ora.

¹¹ Alo mamina, subur manga ti b’rau woi avun dabid’a handagad’id’a d’igi simiyêng mi nde ata yina na; ang nga tamula ki d’ingêra.

¹² Kayam sariya mang nga kad’a suma Siyon-na a le furîd’a, suma kur azì ma Juda-na a aî ki hur ma hapma mi.

¹³ Agi tid’igi nguyugi gulumun ma Siyon-na, agi ndumugi azì mam ma fiyak ma ndjola.

¹⁴ Agi gologi gulumun mama, agi gologizi ad’eng mamba djiviya. Hina wani, agi mba dagizi zlam mbei mi suma kur atchogoi d’a nga d’i mba bugola, ala:

¹⁵ Alo meina nAlo ma didina; nga mi ndjuni gak mat meina mbeî.