Sawal la giled’a 47 - Bible azumeina

Alona namul ma ngol ma yam suma petna

¹ Ni sawal la Kore groma a hlat a hat mi ma ngolâ hi suma hle sawalina.

² Agi suma pet, ar agi tchagi abogi ririp, agi lagi furîd’a, agi suburugi Alona ki delegi akulo.

³ Kayam Ma didina ni ma sä akulo ma kal tegles ma sana ndak á lum mandarama, mam mi amul ma ngol ma te yam andagad’a petna.

⁴ Mi hei ad’enga á te yam suma, mi hulongeî andjaf suma yazi kä ad’ui mi.

⁵ Mi manei andaga d’a djivid’a, tei nga lei djivid’a kad’u, ei nandjafâ hi Jakob ma mam le kama. Tchol ndjö

⁶ Alona nga mi djak akulo ata yima suma a nga gilem kuana; Ma didina nga mi tit avok suma a nga suburum kadifina.

⁷ Ar agi gilegi Alona ki sawala, agi gilegiziya! Agi gilegi amul meina ki sawala, agi gilegiziya!

⁸ Kayam Alona namul ma ngol ma te yam andagad’a petna, agi gilegizi ki sawala.

⁹ Ni mam ba, nga mi te yam andjaf suma, mi nga kaka yam zlam mam mba amul la a tinit irat vata.

¹⁰ Amuleina handjaf suma a tok tu ki suma hAlona hi Abraham-mina, kayam mam mi ma te yam amulei suma ngom suma yam andagad’a petna, mam mi ma akulo kazi petna mi.