Sawal la giled’a 4 - Bible azumeina

Alona mi ndjun David

¹ Ni sawal la David mi hlat kadingâ mi hat mi ma ngolâ hi suma hle sawalina.

² Ang Alo ma we d’ingêr mandina, ata yima an yangâ, ang humunu! Ata yima suma a nga djobon vunana, ang b’lengên hurunu. Ang wan hohowonu, ang hum tchen manda!

³ Agi suma, agi mba mbud’un zulona hina gak mindja ge? Agi min tchugun zlad’a kan hawa hina yak gak mindja ge? Agi hal dagi zla d’a kad’a kan hina gak mindja ge? Tchol ndjö

⁴ Agi wagi ala Ma didina mi wan hohowon ngola; ata yima an nga ni yuma, nga mi humunu.

⁵ Le hurugi zala ni, agi lagi tchod’a d’i; agi djib’eregi kurugi ata yi magi ma burâ, agi kagagi tchugot. Tchol ndjö

⁶ Agi hagi ahle suma ngat buzu suma ndak á hed’ina, agi hagi tagi mi Ma didina mi.

⁷ Suma ablaud’a a nga dala: Ni nge ba, mba mi tagami djivid’a ge? Ma didina, ang tinï irang kamiya.

⁸ Wani furî d’a ang handji kurunda kal furî d’a azi nga furîyût ata yima awu mazina ki süm guguzlu mazid’a a le heîna.

⁹ An bur kä, atogo zak an bur sena halas; Ma didina, ni kayam ang tu ba, an nga kaka bei va mi lan wana.