Sawal la giled’a 29 - Bible azumeina

Dela hi Ma didinid’a nga d’i breî kur d’ugula

¹ Ni sawal la David mi hlata. Agi suma nglo suma sä akulona, agi hagi ngola mi Ma didina, agi dagi woi yam subur mamba ki sib’ik mamba,

² agi dagi woi yam subura hi Ma didinid’a, agi grivigi kä avok Ma didina kahle magi suma a tinizi irazi vazina.

³ Dela hi Ma didinid’a nga d’i zlakulo yam mbina ngungur, Alo ma subura nga mi breî alo ma breîd’a, Ma didina nga mi te yam mbiyo ma nglona.

⁴ Dela hi Ma didinid’a nga d’i ngir kä kad’enga ngingir, dela hi Ma didinid’a nga d’i tak subur mamba woyo,

⁵ dela hi Ma didinid’a nga d’i kus agu sedrena woyo, agu sedre ma Liban-na tam pî, ti kuzum mbeyo.

⁶ Ma didina mba mi dubar ahina d’a Liban-nda d’igi gor amuhlâ mi dubar na, mi dubar ra Hermon-nda d’igi gor avüna mi dubar na mi.

⁷ Dela hi Ma didinid’a nga d’i b’rau wiled’a woi teteng,

⁸ Dela hi Ma didinid’a nga d’i yir hur fulâ, Ma didina nga mi yir hur ful ma Kades-sâ gigidji.

⁹ Dela hi Ma didinid’a nga d’i tes pandrid’a á vuta, ti nga d’i yak hum agud’a kä woyo. Suma kur azina hAlonina pet a nga de ki delezi akulo ala: Ei suburi Alona!

¹⁰ Ma didina ni ma te yam mbiyo ma kus kur atchogoid’a hi Noe-d’ina; Ma didina ni ma te leud’a gak didina.

¹¹ Ma didina nga mi had’enga mi sum mama; Ma didina nga mi b’e vunam yam sum mama ki b’leng nga halasa.