Sawal la giled’a 143 - Bible azumeina

Ma didina, ang kan sariyad’a kan ndi

¹ Ni sawal la gile d’a David mi hlata. Ma didina, ang hum tchen manda, ang hum tchen man nda hud’a, ang hulongôn humba yam d’engzeng manga yam d’ingêr manga mi.

² Ang ka sariyad’a yam an azong mangâ d’i, kayam sama d’ingêr nga yam andagad’a avorong ngi.

³ Ma djangûna nga mi diginu, nga mi mired’en kä andaga, nga mi zud’un kur yima nduvunda d’igi suma a bo adjeu dedeina na.

⁴ Djib’er manda nga ata yat ti, hurun b’lak kurun krovo mi.

⁵ An nga ni djib’er yam bur ma adjeuna, an hulong nga ni djib’er yam sun manga, an nga ni djib’er yam sun nda ang lat kabonga mi.

⁶ An yo abon akulo avorong á tchenengû, an nga ni hat hurun kang d’igi andaga d’a sod’a nga d’i hat hurut yam mbina na. Tchol ndjö

⁷ Ma didina, ang hulongôn humba atogo zak, kayam an nga ni lá bad’a, ang ngei tang iran ndi, ar an mbut d’igi suma a tchuk kä kur zulina na d’i.

⁸ Ki yorogod’a ang aran an hum zla o mang nga bei dabid’a ba d’a, kayam an tin hurun ni kayam angû. Ang tagan lovot ta ndak an tit kuad’a, kayam an he tan ni mi angû.

⁹ Ma didina, ang prud’un ndei abo man suma djangûna; an ngei tan natangû.

¹⁰ Ang had’an á le min manga, kayam angî Alo mana. Ar Muzuk mang ma djivina mi tinin yam andaga d’a abo tat tud’a.

¹¹ Ma didina, yam simiyêngû, ang sud’unu; yam d’ingêr manga, ang pad’an ndei kur ndaka.

¹² Yam o mang nga didinda, ang duk vun man suma djangûna akulo, ang tchi suma a nga tchan iran tata ki zlad’ina woi pet, kayam an nazong mangâ.